ប្រទេសឥណ្ឌូនេស៊ី បានបាញ់និងដាក់រំសេវបំផ្ទុះពន្លិចទូក និងនាវាបរទេសចំនួន១២៥ ពាក់ព័ន្ធនឹងការចូលនេសាទខុសច្បាប់ នៅក្នុងដែនទឹករបស់ខ្លួន ក្នុងកិច្ចខិតខំដើម្បីបញ្ជាក់អះអាងអំពីការត្រួតត្រាកាន់តែម៉ឺងម៉ាត់ឡើងលើដែនសមុទ្រដ៏ធំល្វឹងល្វើយរបស់ខ្លួន នេះបើតាមមន្រ្តីម្នាក់បានបញ្ជាក់អះអាងកាលពីថ្ងៃពុធទី២២ ខែសីហា ឆ្នាំ២០១៨នេះ។

ការពន្លិចចោលនេះត្រូវបានធ្វើឡើងនៅ១១ទីតាំង នៅទូទាំងដែនទឹក ឥណ្ឌូនេស៊ី និងត្រូវបានធ្វើឡើងក្នុងពេលដំណាលគ្នាកាលពីថ្ងៃចន្ទ។ អ្នកនាំពាក្យក្រសួងការបរទេសឥណ្ឌូនេស៊ី លីលី ប្រេហ្គីវ៉ាទី បាននិយាយកាលពីថ្ងៃពុធថា ប្រតិបត្តិការនេះ មិនត្រូវបានប្រកាសជាមុនដើម្បីជៀសវាងទំនាក់ទំនងមិនល្អជាមួយប្រទេសជិតខាង។ ឥណ្ឌូនេស៊ី និយាយថាខ្លួនបានពន្លិចនាវានិងទូកនេសាទខុសច្បាប់ ចាប់តាំងពីខែតុលាឆ្នាំ២០១៤ ភាគច្រើនដោយដាក់រំសេវផ្ទុះ។ រដ្ឋាភិបាលបាននិយាយថា ទូកខុសច្បាប់គឺជាការគំរាមមួយដល់ឧស្សាហកម្មនេសាទក្នុងស្រុករបស់ខ្លួន។ ទូកដែលត្រូវបានពន្លិចកាលពីថ្ងៃចន្ទរួមមាន ទូកនេសាទដោតទង់វៀតណាម៨៦គ្រឿង ម៉ាឡេស៊ី២០ និងហ្វីលីពីន១៤។ ឥណ្ឌូនេស៊ី ដែលជាប្រទេសកម្រងកោះជាង១៧.០០០ អះអាងថា តំបន់សេដ្ឋកិច្ចផ្តាច់មុខរបស់ខ្លួន ច្រើនតែទន្ទ្រានដោយទូកនិងនាវានេសាទបរទេស៕ ប្រភពៈ hong ly