កណ្តាលៈ កាលពីវេលាម៉ោង៩ៈ៣០នាទីព្រឹក ថ្ងៃទី២២ ខែសីហា ឆ្នាំ២០១៨ នៅចំណុចផ្ទះឈ្មោះ សេង អុល ភេទប្រុស អាយុ ៦៨ឆ្នាំ មុខរបរកសិករ (ត្រូវជាឪពុក) ស្ថិតក្នុងភូមិកូនជ្រែ ឃុំព្រែកអំបិល ស្រុកស្អាង ខេត្តកណ្ដាល។ បានប្ដឹងសមត្ថកិច្ចឃាត់ខ្លួនជនសង្ស័យម្នាក់ ពីបទធ្វើឲ្យខូចខាតដោយចេតនា មានឈ្មោះអុល វុទ្ធី ភេទប្រុស អាយុ ៣៩ឆ្នាំ ជនជាតិខ្មែរ មុខរបរ រកត្រី មានទីលំនៅភូមិកូនជ្រែ ឃុំព្រែកអំបិល ស្រុកស្អាង ខេត្តកណ្ដាល ​(ត្រូវជាកូនបង្កើតជនរងគ្រោះ)។

នៅមុនពេលកើតហេតុ ​ជនសង្ស័យ​​មានសភាពស្រវឹងស្រា ហើយមកដល់ផ្ទះឪពុក បានជួបប្អូនស្រីឈ្មោះសេង គីមអ៊ី ក៏ទាមទារលុយចំនួន៥ម៉ឺនរៀល ជាថ្លៃទូ​សម្រាប់លក់ល្ហុងបុក ពេលនោះឈ្មោះសេង គីមអ៊ី បានឲ្យ១ម៉ឺនរៀលសិន តែឈ្មោះ អុល វុទ្ធី មិនព្រមទទួល ហើយភ្លាមនោះឈ្មោះអុល វុទ្ធី ច្រឡោតខឹង ក៏លើកទូ​ល្ហុងបុកបោកបំបែកចោល រួចយកដុំឥដ្ឋគុបចូលក្នុងផ្ទះឪពុកឈ្មោះសេង អុល បណ្ដាលឲ្យបែកកញ្ចក់ទូ​និងបាក់បែកតូបអ្នកតាម្ចាស់ដីបន្ថែមទៀត ។ ​ បញ្ជាក់ ​ឈ្មោះអុល វុទ្ធី តែងតែប្រព្រឹត្តិអំពើហិង្សាក្នុងគ្រួសារ និងគំរាមឪពុកម្ដាយបង្កើតនៅក្នុងខែកក្កដា មក។ បច្ចុប្បន្នជនសង្ស័យបានឃាត់ខ្លួន នៅអធិការដ្ឋាននគបាលស្រុកស្អាង ដើម្បីបន្ដអនុវត្តតាមនីតិវីធី៕