ពោធិ៍សាត់ៈ កាលពីវេលាម៉ោង៦ៈ២០នាទី ព្រលប់ថ្ងៃទី២២ ខែសីហា ឆ្នាំ២០១៨ ស្ថិតនៅត្រង់ចំណុចកន្លែងផឹកសុី លក់សាច់ពិសេស (ឆ្កែ) ក្នុងភូមិព្រៃស្វាយ ឃុំបឹងខ្នារ ស្រុកបាកាន ខេត្តពោធិ៍សាត់។ មានករណីហិង្សាមួយ ដោយមានទំនាសផ្ដើមចេញ ពីក្នុងហាងផឹកសុី និងលក់សាច់ពិសេស (ឆ្កែ) មួយកន្លែង ដោយក្រុមភាគ្គីម្ខាងមានគ្នាចំនួន ៤នាក់ បន្តិចក្រោយមក ក៏មានភាគ្គីម្ខាងទៀតចូលមកអង្គុយតុក្បែរគ្នា មិនទាន់តែបានផឹកសុីផង ស្រាប់តែមើលមុខគ្នាចុះឡើងៗ ក៏កើតទំនាសដេញវាយគ្នាពេញផ្លូវសាធារណៈតែម្ដង។

យោងតាមរបាយការណ៍លោក ញាណ សាវឿន នាយប៉ុស្ដិ៍នគរបាលរដ្ឋបាលបឹងខ្នារបានឲ្យដឹងថា ជនសង្ស័យក្មេងទំនើងទាំងពីក្រុមមានគ្នា ៥នាក់ ត្រូវបានឃាត់ខ្លួនបាន ទី១.ឈ្មោះ ងូច សីលា ភេទប្រុស អាយុ ២០ឆ្នាំ ជនជាតិខ្មែរ រស់នៅភូមិ ឃុំកើតហេតុ។ ទី២.ឈ្មោះ ខេម គង់ ភេទប្រុស អាយុ ២៥ឆ្នាំ ជនជាតិខ្មែរ រស់នៅភូមិ ឃុំមេទឹក ស្រុកបាកាន ខេត្តពោធិ៍សាត់។ ទី៣.ឈ្មោះ អេ ដា ភេទប្រុស អាយុ ២៥ឆ្នាំ ជនជាតិខ្មែរ រស់នៅភូមិ ឃុំជាមួយគ្នា។ ទី៤.ឈ្មោះ អ៊ូ ចាន់ណា ភេទប្រុស អាយុ ១៩ឆ្នាំ ជនជាតិខ្មែរ រស់នៅភូមិ ឃុំជាមួយគ្នា។ និងទី៥.ឈ្មោះ ចាន់ អេង ភេទប្រុស អាយុ ២៥ឆ្នាំ ជនជាតិខ្មែរ រស់នៅភូមិ ឃុំជាមួយគ្នា។ ក្នុងនោះកម្លាំងដកហូតនូវសម្ភារ និងវត្ថុតាងរួមមាន ម៉ូតូ ១គ្រឿងម៉ាក ហុងដាឌ្រីម សេ១២៥ សេរីឆ្នាំ២០១៥ ពណ៌ខ្មៅ ពាក់ស្លាកលេខ ពោធិសាត់ 1F 4944 ដបស្រាចំនួន ៤ដប និងដែកបំពង់ទីបប្រវែងកន្លះម៉ែត្រ ១ដើម។ ហើយចំពោះជនសង្ស័យទាំង ៥នាក់ បាននឹងកំពុងបន្តនីតិវិធី ដើម្បីអប់រំដោយលាយលក្ខណ៍ជាអក្សរ និងមានអ្នកធានាត្រឹមត្រូវ៕