បន្ទាយមានជ័យៈ នៅព្រឹកថ្ងៃទី២២ ខែសីហា ឆ្នាំ២០១៨ នៅក្នុងសង្កាត់ ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ លោក សាន វិជ្ជាសារ៉ាវុធ ប្រធានសាខាកាំកុងត្រូល ខេត្តបន្ទាយមានជ័យ បានឲ្យដឹងថា ការដុតបំផ្លាញចោលទំនិញខូចគុណភាពចម្រុះចំនួន១០៣៣គីឡូក្រាមនេះ គឺយើងធ្វើការដកហូតបាននៅតាមសាលារៀន តាមផ្សារនានានៅក្នុងខេត្តបន្ទាយមានជ័យ អំឡុងខែ៧ដើម ឆ្នាំ២០១៨ ក្រោមកិច្ចសហការរបស់មន្ត្រី សាខាកាំកុងត្រូល ជាមួយកម្លាំងនគរបាលប្រឆាំងបទល្មើសសេដ្ឋកិច្ច និងមន្ទីរពាណិជ្ជកម្មខេត្ត ដោយធ្វើការត្រួតពិនិត្យឆែកឆេរ និង រកឃើញទៅលើអាជីវករលក់ដូរនៅផ្សារ និងនៅតាមផ្ទះ ហើយបានធ្វើការអប់រំនិងប្រមូលយកមករក្សាទុក និងបានយកដុតកម្ទេចនៅពេលនេះ។
លោកបានបន្តទៀតថា ផលិតផលម្ហូបអាហារខូចគុណភាពទាំងនេះ មិនមានគុណភាព អនាម័យ និងសុវត្ថិភាពសម្រាប់មនុស្សយកទៅបរិភោគបានឡើយ និង គ្មានអនុលោមភាពតាមច្បាប់ស្តីពីការគ្រប់គ្រងគុណភាព សុវត្ថិភាពលើផលិតផលទំនិញ និង សេវា ទើបសមត្ថកិច្ចកាំកុងត្រូលយកផលិតផលម្ហូបអាហារខូចគុណភាពទាំងនេះ ទៅដុតកម្ទេចចោល។ សូមបញ្ជាក់ថា ការចុះត្រួតពិនិត្យគុណភាពសុវត្ថិភាព ផលិតផលម្ហូបអាហារ នៅលើទីផ្សារក្នុងខេត្ត មន្ត្រីជំនាញក៏បានធ្វើតេស្ត រកសារធាតុគីមីបូរ៉ាក់ ទៅលើសរសៃគុយទាវ និងចាហួយខ្មៅ ដែលផ្ទុកសារធាតុគីមីបូរ៉ាក់ ជាប្រចាំផងដែរ តែមិនសូវមានទេ ៕