ភ្នំពេញ ៖ ជនសង្ស័យម្នាក់ ត្រូវកម្លាំងនគរបាលប៉ុស្តិ៍រដ្ឋបាលបឹងកក់ទី១ សហការជាមួយប្រជាពលរដ្ឋ ដេញចាប់វ៉ៃខ្នោះ បន្ទាប់ពីបានធ្វើសកម្មភាពឆក់កាបូបពីនារីម្នាក់ ដែលកំពុងជិះម៉ូតូបានសម្រេច កាលពីវេលាម៉ោង​១២និង៣០នាទី​ថ្ងៃត្រង់ ថ្ងៃទី​២៤ ខែ​សីហា ឆ្នាំ​២០១៨នេះ​ នៅចំណុចរង្វង់មូលទួលគោក សង្កាត់បឹងកក់ទី២ ខណ្ឌទួលគោក រាជាធានីភ្នំពេញ។

ជនសង្ស័យដែលសមត្ថកិច្ចឃាត់ខ្លួនបានមានឈ្មោះ ​សុខ សាន ហៅសាន ភេទប្រុស​ អាយុ១៧ឆ្នាំ​ ស្នាក់នៅខណ្ឌសែនសុខ មុខរបរជាសិស្ស សាលាឥន្ទ្រទេវី។ ចំណែកជនរងគ្រោះមិនបានស្គាល់អត្តសញ្ញាណ (ភេទស្រី) សម្ភារដែលបាត់បង់ (កាបូបស្ពាយ)។ នគរបាលប៉ុស្ដិ៍បឹងកក់២បានឱ្យដឹងថា​ មុនពេលកើតហេតុ នាងបានជិះម៉ូតូមួយគ្រឿង​ ដោយបានស្ពាយកាបូប ធ្វើដំណើរចេញពីផ្ទះ ខណៈមកដល់ចំណុចកើតហេតុផុតរង្វង់មូលទួលគោក ស្រាប់តែមានជនសង្ស័យជិះម៉ូតូមួយគ្រឿងម៉ាកហុងដាឌ្រីមសង់ ពណ៌ទឹកប្រាក់ ពាក់ស្លាកលេខ ភ្នំពេញ1GR-1617 មកក្បែររួចធ្វើសកម្មភាពឆក់កាបូបស្ពាយរបស់នារីរងគ្រោះបានសម្រេច​ បណ្តាលឲ្យនាងដួលរងរបួសស្រាល​ ។ ភ្លាមៗនោះនាងក៏បានស្រែកឆោឡោផ្អើលដល់អ្នកដំណើរ និងសមត្ថកិច្ចមូលដ្ឋានប៉ុស្តិ៍បឹងកក់ជួយអន្តរាគមន៍ដេញចាប់ក្រុមចោរឆក់ខាងលើនេះ​ តាមរហូតដល់ចំណុចផ្លូវ៥១៦ ក្នុងសង្កាត់បឹងកក់ទី១ ត្រូវសមត្ថកិច្ចឃាត់បានជនសង្ស័យបាន និងដកហូតម៉ូតូមួយគ្រឿងដែលជាមធ្យោបាយធ្វើសកម្មភាពឆក់ មកកាន់ប៉ុស្តិ៍រដ្ឋបាលបឹងកក់ទី១ តែម្តង​ ។ ​ ក្រោយកើតហេតុជនសង្ស័យជនដែលឃាត់បាននេះរួមនឹងម៉ូតូធ្វើសកម្មភាព ត្រូវបានបញ្ជូនទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌទួលគោក​ រង់ចាំកសាងសំណុំរឿងបញ្ជូនបន្តទៅសាលាដំបូងរាជធានីភ្នំពេញផ្តន្ទាទោសតាមនីតិវិធីច្បាប់៕ ដោយៈ ភារ៉ា