ភ្នំពេញ៖ ម្ចាស់បទ "មិនស្រលាញ់អូនមិនបាន" ដែលមានភាពល្បីល្បាញពេញប្រទេស និងទទួលបានការគាំទ្រយ៉ាងច្រើន។ កាលពីពេលថ្មីៗនេះ តារាចម្រៀងដែលមានឈ្មោះថា ចាន់ សម័យ ត្រូវបានមហាជនយ៉ាងច្រើនមានការអាណិតអាសូរ ព្រោះតែរូបលោកបានធ្លាក់នៅក្នុងស្ថានភាពយ៉ាងកំសត់ រកតែលុយមើលជំងឺមិនបានផង។ ក្រោយពីក្តីអស់សង្ឃឹម និងរួចផុតពីភាពកំសត់ផងនោះ ស្រាប់តែពេលនេះ បានលេចចេញនូវវត្តមានរបស់លោក ដោយធ្វើការបន់ថ្វាយជ្រូកខ្វៃលាបំណន់​បារមីយាយម៉ៅ បង្កមានមន្ទិលថា "តើលោកបានប់អី? បានជារត់ទៅថ្វាយជ្រូកទាំងព្រលឹម?"។

យ៉ាងណាមិញ​តារាចម្រៀងដែលទទួលបានការគាំទ្រយ៉ាងច្រើន ពីសំណាក់មហាជន និងត្រូវរស់នៅយ៉ាងកំសត់នោះ ក៏ត្រូវបានសប្បុរសជនជាច្រើនជួយ ជាពិសេសលោកមិនភ្លេចគុណចំពោះ សម្តេចតេជោ ផ្តល់ថវិកា ១ម៉ឺនដុល្លារ និងឧកញ៉ា ឡេង ណាវ៉ាត្រា ផ្តល់ដីមួយឡូត៍ សម្រាប់សង់ផ្ទះ។ តារាចម្រៀងរូបនេះ ក៏បានប្រាប់ទៀតថាការដែលលោកមកលាបំណន់នេះ ដោយសារតែ កាលពីមុនលោកបានមកបន់បារមីលោកយាយម៉ៅ ឲ្យជួយ ដោយលោកបានរៀបរាប់ថា "ខ្ញុំធ្លាប់បានទៅបន់ស្រន់នូវកន្លែងលោកយាយម៉ៅថា បេីខ្ញុំបានទៅស្រុកក្រៅម៉ែន ខ្ញុំនឹងថ្វាយជ្រូកខ្វៃជូនលោកយាយម៉ៅ រឿងមានតែប៉ុណ្ណឹងទេបង"។ ប្រភព៖ ចាន់ សម័យ