រាជធានីភ្នំពេញ៖ ប្រជាពលរដ្ឋប្រហែលជាង២០០នាក់ មានការខឹងស្របានិងផ្ទុះការតវ៉ាជាមួយព្រះចៅអធិការវត្ដកំពង់ក្ដុល ដែលស្ថិតភូមិខ្វិត សង្កាត់សាក់សំពៅ ខណ្ឌដង្កោ ពាក់ព័ន្ធករណីចោទប្រកាន់ព្រះចៅអធិការវត្ដកំពុងក្ដុលថា មានប្រពន្ធមានកូន និងប្រើប្រាស់ថ្នាំញៀន ក្រោយពីបែកធ្លាយវីដេអូបង្ហោះតាមបណ្ដាញសង្គមហ្វេសប៊ុក ។

ជាក់ស្ដែងនៅវេលាម៉ោង២ រសៀលថ្ងៃទី៣១ ខែសីហា ឆ្នាំ២០១៨ប្រជាពល រដ្ឋដែលរស់នៅក្បែរៗវត្ដកំពង់ក្ដុលបានលើកគ្នាមកធ្វើការតវ៉ាពេញនៅក្នុងវត្ដ ហើយក៏មានលោកតាអាចារ្យ២នាក់ចេញមកធ្វើការអន្ដរាគមន៍ដោយសួរប្រជាពលរដ្ឋថា នាំគ្នាមកក្នុងវត្ដធ្វើអ្វី ម្ដេចក៏មិននាំគ្នាទៅប្ដឹងទៅ ។ បើយោងតាមសម្ដីប្រជាពលរដ្ឋដែលនាំគ្នាមកធ្វើការតវ៉ានៅក្នុងវត្ដបានលើកឡើងថា រយៈពេល៣-៤ឆ្នាំមុនព្រះចៅអធិការវត្ដកំពង់ក្ដុលបានបែកធ្លាយរឿងមានប្រពន្ធកូនម្ដងរួចមកហើយ ប៉ុន្ដែប្រជាពលរដ្ឋមិនបាននាំគ្នាធ្វើការតវ៉ាអ្វីទេ គ្រាន់តែបានពិភាក្សាជាមួយគណៈកម្មាធិការវត្ដស្នើរសុំឲ្យព្រះចៅអធិការវត្ដផ្សឹកចេញទៅ ។ ក្រោយមកព្រះចៅអធិការវត្ដកំពង់ក្ដុលមានពុទ្ធិការថា មិនបាច់ម៉ាត់កអ្វីទេ ចាំស្ងាត់លោកនិងផ្សឹកដោយខ្លួនឯង ប៉ុន្ដែរហូតមកដល់ថ្ងៃផ្ទុះការតវ៉ានេះទើបប្រជាពលរដ្ឋដែលរស់នៅក្បែរវត្ដកំពង់ក្ដុល បានឃើញឃ្លីបវីដេអូដែលបង្ហោះតាមបណ្ដាញសង្គមហ្វេសប៊ុករបស់ព្រះចៅអធិការវត្ដកំពពង់ក្ដុលចាក់ចម្រៀងឲ្យកូនស្រីរាំហើយប្រឡែងគ្នាលេង និងមានឃ្លីបវីដេអូប្រើប្រាស់ថ្នាំញៀនថែមទៀត ទើបប្រជាពលរដ្ឋមានការខឹងស្របាយ៉ាងខ្លាំងក៏នាំគ្នាមកផ្ទុះការតវ៉ានៅក្នុងវត្ដកំពង់ក្ដុលតែម្ដង ដើម្បីស្នើរសុំឲ្យគណៈកម្មាធិកាវត្ដផ្សឹកព្រះចៅអធិកាវត្ដចេញ ។ ជុំវិញករណីប្រជាពលរដ្ឋផ្ទុះការតវ៉ានៅក្នុងវត្ដកំពង់ក្ដុល ព្រះចៅអធិការមិនបានចេញមកបកស្រាយបំភ្លឺចំពោះមុខប្រជាពលរដ្ឋឡើយ ដោយមានលោកតាអាចារ្យ ២នាក់ចេញមុខមករេរាំង និង ឲ្យប្រជាពលរដ្ឋផ្ដិតមេដៃ ដើម្បីយកទៅប្រគល់ឲ្យអនុគុណខណ្ឌដង្កោ ។ ពាក់ព័ន្ធករណីខាងលើនេះភ្នាក់ងារសារព័ត៌មានយើងនិងរង់ចាំមើលថា តើអនុគុណខណ្ឌដង្កោមានចំណាត់ការយ៉ាងណាចំពោះការចោទប្រកាន់របស់ប្រជាពលរដ្ឋទៅលើព្រះចៅអធិការវត្ដកំពង់ក្ដុល..? ៕ ដោយៈ ភារ៉ា