កណ្តាលៈ កាលពីថ្ងៃទី១ ខែមករា ឆ្នាំ២០១៩ នៅចំណុច ភូមិពាមរាំងក្រោម ឃុំពាមរាំង ស្រុកលើកដែក ខេត្តកណ្តាល។ មានករណីហឹង្សាមួយ ដោយលោកកូនជើងល្អ ក្រោយពេលដើរលេងស៊ីផឹកស្រវឹង បានត្រឡប់មកដល់ផ្ទះវិញ ក៏សុំលុយម្តាយ ដើម្បីយកទៅទិញទូរស័ព្ទប្រើនឹងគេ តែម្តាយមិនព្រមអោយ ក៏កើតហិង្សា វាយបំផ្លាញទ្រព្យសម្បត្តិក្នុងផ្ទះខ្ទេចអស់ ឃើញដូច្នោះម្តាយ ក៏បានមកប្តឹងសមត្ថកិច្ច ដើម្បីជួយអន្តរាគមន៍ និងឃាត់ខ្លួនជនសង្ស័យតែម្តង។
ជនរងគ្រោះ ឈ្មោះ សរ នឿន ភេទស្រី អាយុ៥៩ឆ្នាំ ជនជាតិខ្មែរមុខរបរកសិករ មានទីលំនៅភូមិឃុំកើតហេតុខាងលើ ត្រូវជាម្តាយបង្កើតរបស់ជនសង្ស័យ។ ចំណែកជនសង្ស័យជាកូនឈ្មោះ ហង់ សុទ្ធា ភេទប្រុស អាយុ៣១ឆ្នាំ ជនជាតិខ្មែរ មុខរបរមិនពិត មានទីលំនៅៗ ជាមួយម្តាយបង្កើត នៅភូមិឃុំកើតហេតុខាងលើ។ ជនសង្ស័យបានផឹកស្រាស្រវឹង ហើយសុំលុយម្តាយ ដើម្បីទិញទូរស័ព្ទប្រើ ប៉ុន្តែម្តាយមិនព្រមអោយខ្លួន ក៏ខឹងរួចបានធ្វើការវាយបំផ្លិចបំផ្លាញ ទ្រព្យសម្បត្តិរបស់របរសំភារៈ ក្នុងផ្ទះខ្ទេចខ្ទីអស់។
ភ្លាមនោះម្តាយរបស់ជនសង្ស័យ ក៏បានប្តឹងសមត្ថកិច្ច ប៉ុស្តិ៍នគរបាលឃុំពាមរាំងឱ្យជួយអន្តរាគមន៍។ ពេលនោះកម្លាំង នគរបាលប៉ុស្តិ៍ ក៏បានចុះទៅដល់កន្លែងកើតហេតុ រួចធ្វើការនាំខ្លួនជនសង្ស័យឈ្មោះហង់ សុទ្ធា មកកាន់ប៉ុស្តិ៍រដ្ឋបាល ពាមរាំងហើយបញ្ជូនជនសង្ស័យ មកកាន់ផ្នែកជំនាញនគរបាលយុត្តិធម៌ស្រុក ដើម្បីកសាងសំណុំរឿងចាត់ការតាមនីតិវិធី ៕