ភ្នំពេញៈ កាលពីម៉ោង៩ព្រឹក ថ្ងៃទី៨ ខែមករា ឆ្នាំ២០១៩ នៅចំណុចស្ពានជ្រោយចង្វារថ្មី ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។ មានហេតុការណ៏ភ្ញាក់ផ្អើលមួយ ដោយស្ត្រីម្នាក់ មានឈ្មោះ ថុន រ៉ានី អាយុ៣០ឆ្នាំ មុខរបរ នៅផ្ទះ ស្នាក់នៅផ្ទះជួល សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ និងមានកូនចំនួន២នាក់។ បានព្យាយាម ដើរមកលោតទឹកសម្លាប់ខ្លួន នៅលើស្ពានជ្រោយចង្វារ ដោយសារតែខឹងប្តីចុងរបស់ខ្លួន ចោទនាងថា មានបំណងទៅរកប្តីដើមវិញ ទោះបីនាងនិយាយប្រាប់យ៉ាងណា ក៏ប្តីចុងនៅតែមិនជឿ ទើបនាងដាច់មកលោតទឹកនៅស្ពានជ្រោយចង្វារ តែត្រូវសមត្ថកិច្ចជួយទាន់ ។
តាមសំដីរបស់ស្ត្រីរងគ្រោះខាងលើ បានប្រាប់ឲ្យដឹងថា ដោយសារតែនាងមានវិបត្តិនៅក្នុងគ្រួសារ គឺប្តីក្រោយរបស់នាង បានចោទរូបនាងថា ទៅរកប្តីមុន ទោះបីនាង ខំនិយាយបែបណាក៏ដោយ នៅតែប្តីក្រោយមិនជឿរូបនាងរហូត ទើបធ្វើឲ្យរូបនាងមានវិបត្តិបែបនេះ ដោយគិតអ្វីមិនចេញក៏ សម្រេចចិត្តដើរមកលោតទឹក ពីលើកស្ពានជ្រោយចង្វារ ដើម្បីបញ្ចប់ជីវិតរបស់ខ្លួន ខណៈដែលរូបនាងបម្រុងលោតទឹកសម្លាប់ខ្លួននោះ ស្រាប់តែត្រូវបានកម្លាំងសមត្ថកិច្ច ដែលនៅក្បែរនោះ ឃាត់ខ្លួនរូបនាងយកចុះមកខាងក្រោម ដើម្បីសួរនាំ។
សមត្ថកិច្ចបាននាំស្ត្រីរូបនេះ មកកាន់ប៉ុស្តិ៍នគរបាលជ្រោយចង្វារ ដើម្បីសាកសួរ និងទាក់ទងហៅសាច់ញាតិ មកទទួលយកទៅផ្ទះវិញ ៕