រឿងក្នុងសង្គមធ្វើឲ្យក្មេងៗ យកគំរូតាម.... ក្មេងស្រីម្នាក់ ក្នុងចំណោម៣នាក់ នាំគ្នាលេងល្បែងហួសហេតុ ល្បែងមរណៈ បណ្ដាលឲ្យស្លាប់ម្នាក់ ២នាក់ទៀតរួចខ្លួន ព្រោះតែឈប់លេង

ព្រះសីហនុៈ នគរបាល ខេត្តព្រះសីហនុ បានឲ្យដឹងថាៈ នៅថ្ងៃទី១៤ ខែមករា ឆ្នាំ២០១៨ វេលាម៉ោង១៧ៈ៣០នាទី មានក្មេង៣ នាក់ បាននាំគ្នាលេងចង.ក បណ្តាលឲ្យស្លាប់ម្នាក់ នៅតំបន់១៨០ខ្នង ក្នុងក្រុម២១ ភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ។ បណ្តាលឲ្យជនរងគ្រោះឈ្មោះ ផាត សុខា ភេទស្រី អាយុ៧ឆ្នាំ ឪពុកឈ្មោះ ផាត សុភណ្ឌ អាយុ៤២ឆ្នាំ មុខរបរកម្មករ ម្ដាយឈ្មោះ ហៀង ខន អាយុ២៧ឆ្នាំ មុខរបរមេផ្ទះ ស្លាប់នៅកន្លែងកើតហេតុ។

នគរបាលបញ្ជាក់ថា មូលហេតុដោយសារ មានក្មេងៗ ទាំង៣នាក់ អាយុ៧ឆ្នាំម្នាក់ អាយុ៥ឆ្នាំម្នាក់ និងអាយុ៣ឆ្នាំម្នាក់ បាននាំគ្នាលេងល្បែងចង.ក (ល្បែងមរណៈ) ហើយក៏ជ្រុលស្លាប់ ក្មេងស្រីម្នាក់ ឈ្មោះ សុខា អាយុ៧ឆ្នាំ តែម្តង។ រីឯក្មេងតូចៗ២នាក់ទៀត ដែលមិនទាន់ បានលេងល្បែងមរណៈនេះ ក៏បានរួចពីសេចក្តីស្លាប់ទៅ ៕