ភ្នំពេញ៖ រថយន្តដឹកទូរកុងតឺន័រខុសទាំងទ្រង់ទ្រាយ ខុសទាំងបច្ចេកទេស បើកបរដោយយុវជនស្ទើរភ្លើងម្នាក់ បណ្តាលអោយប៉ះរថយន្តស៊េរីទំនើបមួយគ្រឿង ហើយហេតុការណ៍បង្កអោយមានការកក់ស្ទះជាច្រើនម៉ោង កាលពីវេលាម៉ោង៨និង៣០នាទីព្រឹកថ្ងៃទី១៨ខែមករាឆ្នាំ២០១៩ នៅតាមបណ្តោយផ្លូវលេខ១៦៣កែងនឹងផ្លូវលេខ៣៨៦សង្កាត់បឹងកេងកង៣ ខណ្ឌចំការមន។
រថយន្ត FORTUNER ពណ៌សស្លាកលេខភ្នំពេញ2AK-8991ចតនៅលើចិញ្ចើមផ្លូវលេខ៣៨៦ ចំណែករថយន្ត HYUNDAI ដឹកទូរកុងតឺន័រក្បាលរថយន្តស្លាកលេខ3D-8447សណ្តោងកន្ទុយស្លាកលេខភ្នំពេញ4A-1426 ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានអោយដឹងថា មុនពេលកើតហេតុមិនថារថយន្តកុងតឺន័រដ៏វែងនេះចូលមកក្នងក្រុងតាមច្រកណាទេ បានបង្កអោយមានការកក់ស្ទះយ៉ាងខ្លាំង ហើយពេលដែលមកដ៏ចំណុចកើតហេតុខាងលើ រថយន្តកុងតឺន័រនេះបានបត់ទៅឡើងទៅផ្លូវ១៦៣ស្រាប់តែកន្ទុយកុងតឺន័រ បានជ្រុលទៅប៉ះនឹងរថយន្ត FORTUNER ដែលកំពុងចត បណ្តាលអោយបែកស្តុបនឹងកំពឹតរថយន្តផ្នែកខាងក្រោយយ៉ាងដំណំ។
គួររំលឹកថា កាលពីចុងឆ្នាំ២០១៨ ឯកឧត្តម ឃួង ស្រេង អភិបាលរាជធានីភ្នំពេញ ធ្លាប់បានលើកឡើងថា៖ ចាប់ពីពេលនេះតទៅឡានធំៗ ចេញ-ចូល រាជធានីភ្នំពេញពេលថ្ងៃ មិនអនុញ្ញាតិឱ្យមានដាច់ខាត ហើយក៏លែងឱ្យមានការកំណត់ម៉ោងនេះម៉ោងនោះចេញ ចូលក្រុងដូចមុនទៀតដែរ ដូចជាប័ណ្ណអនុញ្ញាតិចេញ ចូល A-BនិងCជាដើមត្រូវបញ្ចប់។ លោកអភិបាលរាជធានីបានបញ្ជាក់ថា៖ កន្លងមកនេះរថយន្ត ចេញ-ចូល រាជធានីភ្នំពេញបានតាមចិត្តឱ្យតែមានប័ណ្ណអនុញ្ញាតិ ចេញ-ចូល ក្រុងប្រភេទ A-B និងCនេះ បង្ករឱ្យមានគ្រោះថ្នាក់និងកកស្ទះចរាចរ នៅក្នុងរាជធានីភ្នំពេញយ៉ាងខ្លាំង។ ដូច្នេះចាប់ពីពេលនេះតទៅឡានធំៗ ចេញ-ចូលរាជធានីភ្នំពេញពេលថ្ងៃ មិនអនុញ្ញាតិឱ្យមានដាច់ខាត តែអាចចេញចូលក្រុងបានចាប់ពីម៉ោង ៨ទៅ៩យប់បាន។
ការដាក់បទបញ្ជាយ៉ាងម៉ឺងម៉ាត់របស់ឯកឧត្តម ឃួង ស្រេង អភិបាលរាជធានីភ្នំពេញ ប៉ុន្តែមន្រ្តីក្រោមឱវាទគ្មានអ្នកណាអនុត្តន៍តាម បញ្ជានេះទេ។
ក្នុងហេតុការណ៍គ្រោះថ្នាក់ចរាចរណ៍ខាងលើនេះ ត្រូវបានសមត្ថកិច្ចមូលដ្ឋានចុះវាស់វែង នឹងជួយសម្រួលអោយភាគីរថយន្តដឹកកុងតឺន័រជួយដោះស្រាយសងជាសំណងទៅអោយភាគីរថយន្តFORTUNER ដោយហេតុផលមួយ ជៀសវាងកុំអោយវែងឆ្ងាយ ដើម្បីបញ្ចប់រឿងនៅកន្លែងកើតហេតុ៕
ដោយៈ ភារ៉ា
