កំពង់ចាម៖ នៅថ្ងៃទី២០ ខែមករា ឆ្នាំ២០១៩ វេលាម៉ោង៩និង១៥នាទី លោកអធិការនគរបាលស្រុកចំការលើ បានទទួលព័ត៌មានពីប្រជាពលរដ្ឋថាមានករណីអគ្គិភ័យ (ភ្លើងឆេះផ្ទះ) នៅចំណុចភូមិថ្នល់បែកកើត ឃុំស្វាយទាប ស្រុកចំការលើ ថាមានភ្លើងឆេះផ្ទះ របស់ឈ្មោះ *វេង ងាន់សេង* ភេទប្រុស អាយុ៣៦ឆ្នាំ ជនជាតិខ្មែរ មានទីលំនៅ ភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម។
ក្រោយពីទទួលបានព័ត៌មាន លោកអធិការនគរបាលស្រុកចំការលើ បានដឹកនាំកម្លាំង និងបានបញ្ចេញរថយន្ដពន្លត់អគ្គិភ័យ របស់អធិការដ្ឋាន ១គ្រឿង ចុះទៅកន្លែងកើតហេតុ ។ ហើយលោកអធិការស្រុកចំការលើ បានរាយការណ៍ជូនលោកឧត្តមសេនីយ៍ស្នងការនគរបាលខេត្ដ លោកឧត្តមសេនីយ៍ស្នងការ បានបញ្ជាអោយរថយន្ដពន្លត់អគ្គីភ័យ របស់ស្នងការដ្ឋានខេត្ត ១គ្រឿង ,អធិការដ្ឋានស្រុកកំពង់សៀម ១គ្រឿង និងរបស់អធិការដ្ឋានស្រុកស្ទឹងត្រង់ ១គ្រឿង ដើម្បីការពារកុំអោយរាលដាលទៅផ្ទះផ្សេងទៀត ។
ហេតុការណ៍នេះសមត្ថកិច្ចបានប្រើប្រាស់រថយន្តពន្លត់អគ្គិភ័យសរុប ចំនួន ៤ គ្រឿង អស់ទឹកចំនួន ៦ រថយន្ដ (អធិការដ្ឋានស្រុកចំការលើ ១ គ្រឿង អស់ទឹក ៣ រថយន្ដ ,ស្នងការដ្ឋាន ១ គ្រឿង អស់ទឹក ១ រថយន្ដ ,ស្រុកកំពង់សៀម ១ គ្រឿង អស់ទឹក ១ រថយន្ដ និងស្រុកស្ទឹងត្រង់ ១ គ្រឿង អស់ទឹក ១ រថយន្ដ)* ទើបរលត់អស់ នៅវេលាម៉ោង១២:០០នាទី នាថ្ងៃខែឆ្នាំដដែល។
ករណីនេះបណ្តាលអោយរបួសមនុស្សកំរិតស្រាល ចំនួន២នាក់ ដោយសាររលាកអណ្ដាតភ្លើង: ១.ឈ្មោះ *សឹប គឹមស៊ី* ភេទស្រី អាយុ ៦៤ឆ្នាំ (ជាម្ដាយ) ២.ឈ្មោះ *អែន ស្រីទូច* ភេទស្រី អាយុ ៣៤ ឆ្នាំ (ជាកូន) និងឆេះអស់ផ្ទះ ១ខ្នង ទំហំ ៦ម៉ែត្រ x ១៤ម៉ែត្រ សង់ពីឈើប្រក់ក្បឿង ថ្មខាងក្រោម។
សម្ភារបាត់បង់រួមមាន ៖ ប្រាក់៣០ម៉ឺនរៀល ,គ្រែ៣ ,ទូរខោអាវ៥ ម៉ាស៊ីនបោកខោអាវ១, ទូរទឹកកក១, ស្រូវ១៥បេ, ទូរទស្សន៍ ៣គ្រឿង ដោយមូលហេតុ បណ្តាលមកពីភ្លើងធូប អុចថ្ងៃសីល ៕
ប្រភព៖ នគរបាលជាតិ