ហ្វេសប៊ុក ៖ នេះបើយោងទៅតាមគណនីហ្វេសប៊ុកផេកដែលមានឈ្មោះថា Dana Try បានធ្វើការលើកឡើងឲ្យដឹងនៅលើបណ្តាញសង្គមហ្វេសប៊ុកថា ៖ ឃើញដំបូងមិនដឹងថាជាអ្វីឱ្យប្រាកដនៅក្នុងចាន គ្រាន់តែមើលទៅសង្វេគពេក។ ពេលអានបន្តិច ទើបដឹងថាគាត់សុំឆ្អឹងត្រីគេសល់ពីបេះធ្វើទឹកគ្រឿង មកឱ្យកូនៗហូប ជាមួយអំបិលម្ទេស។
ជីវិតមនុស្សពេលខ្លះពិតជាពិបាកពេកហើយ សូម្បីបាយ ៣ពេលចម្អែតក្រពះដើម្បីរស់ ក៏មិនអាចរកបាន។ ខ្ញុំឃើញរូបភាពចឹងៗ ខ្ញុំរន្ធត់ចិត្តណាស់។ ចេះតែគិតថា បើគេមានលុយ ផឹកកាហ្វេមួយកែវសុទ្ធតែ ៣ដុល្លារ ឯពួកគាត់នេះវិញ បើបាន ៣ដុល្លារមកទិញអង្ករហូប មិនដឹងថាសប្បាយចិត្តយ៉ាងណា។
ខ្ញុំគិតហើយ ថាចង់ជួយគាត់ជាជំនួយខ្លះ ប៉ុន្តែបើជួយគាត់បែបនេះ ដូចឱ្យតែត្រី មិនប្រាប់បឹង បានតែមួយរយៈ គាត់នឹងវិលទៅរកសភាពដើមវិញ។ ខ្ញុំចង់ជួយបង្កើតមុខរបរឱ្យគាត់វិញ ឱ្យតែច្បាស់ថាគាត់ចង់ធ្វើអី ចិញ្ចឹមត្រី មាន់ ទា ក៏បាន លក់ដូរនំចំណី លក់បន្លែ ដាំបន្លែអីក៏បាន ឬអាចមានរបរផ្សេង ដែលឱ្យគាត់ចិញ្ចឹមកូនរស់។ បើមានបងប្អូនណា ស្គាល់គាត់ច្បាស់ ជួយប្រាប់ខ្ញុំផង ខ្ញុំនឹងជួយគាត់ បង្កើតមុខរបរដល់គាត់ កុំឱ្យគាត់ពិបាកទៀត សំខាន់ឱ្យតែមានឆន្ទៈចង់ធ្វើ។
