ភ្នំពេញ៖ កាលពីវេលាម៉ោង៧យប់ថ្ងៃសុក្រ ទី១៩ ខែមិថុនា ឆ្នាំ២០២០ ត្រង់ចំណុចច្រកចូលវត្តអង្គតាមិញ ក្នុងសង្កាត់ចោមចៅទី១ ខណ្ឌពោធិ៍សែនជ័យ ខណៈពេលដែលសមត្ថកិច្ចម្នាក់កំពុងតែសម្រួលចរាចរណ៍ជូនបងប្អូន ស្រាប់តែមានបុរសម្នាក់បើករថយន្តទៅបុកគាត់ឲ្យរងរបួស ហើយព្យាយាមបើករត់តាំងពីផ្លូវជាតិលេខ៤ ទៅផ្លូវវ៉េងស្រេង ចូលទៅផ្លូវបេតុងច្រកចូលវត្តអង្គតាមិញ បង្កឲ្យមានការ ភ្ញាក់ផ្អើលដល់ប្រជាពលរដ្ឋនិងអ្នកធ្វើដំណើរតាមផ្លូវយ៉ាងខ្លាំង។
បើតាមសមត្ថកិច្ចបានឲ្យដឹងថា រថយន្តដែលបើកបុកសមត្ថកិច្ច ម៉ាក ឡិចស៊ីស RX400h ពណ៌ស ពាក់ផ្លាកលេខភ្នំពេញ 2AU 2064។
សមត្ថកិច្ចបានបន្តទៀតថា មុនពេលកើតហេតុ មានរថយន្តមួយគ្រឿងម៉ាក ឡិចស៊ី បើកបរដោយបុរសម្នាក់ ជិះតាមបណ្តោយផ្លូវ ជាតិលេខ៤ លុះដល់រង្វង់មូលចោមចៅ ស្រាប់តែទៅបុកសមត្ថកិច្ច កំពុងតែសម្រួលចរាចរំ៍ឲ្យរងរបួស ហើយក៏ព្យាយាមបើករត់ តាមបណ្ដោយផ្លូវវ៉េងស្រេងរហូតដល់ស្តុបទួលពង្រ ក៏បត់ចូលផ្លូវបេតុងច្រកចូលវត្តអង្គតាមិញ ត្រូវបានសមត្ថកិច្ចនិងប្រជាពលរដ្ឋដេញចាប់បាន បង្កឱ្យមានការភ្ញាក់ផ្អើលយ៉ាងខ្លាំងមានការកកស្ទះ ដល់ប្រជាពលរដ្ឋអ្នកធ្វើដំណើរតាមផ្លូវបានឈប់មើលព្រោងព្រាត។
បច្ចុប្បន្នសមត្ថកិច្ចក៏បាននាំទាំងរថយន្តនិងជនបង្កទៅស្នងការនគរបាលរាជធានីភ្នំពេញបាន ដើម្បីដោះស្រាយតាមផ្លូវច្បាប់៕
