ភ្នំពេញ៖ កម្លាំងប៉ុស្តិ៍នគរបាលរដ្ឋបាលវាលវង់ នៃអធិការដ្ឋាននគរបាលខណ្ឌ៧មករា សហការជាមួយកម្លាំងនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ និងកម្លាំងអធិការដ្ឋាននគរបាលខណ្ឌទួលគោក បានស្រាវជ្រាវឃាត់ខ្លួនបានយុវជនម្នាក់ដែលប្រើអំពើហិង្សាយកខ្សែក្រវ៉ាត់និងកាំបិតបុ័ងតោ វាយ និង កាប់ទៅលើបុរសម្នាក់បណ្តាលឱ្យរងរបួសនិងកាប់បំផ្លាញម៉ូតូជនរងគ្រោះរងការខូចខាតខណៈមានការប៉ះពាក្យសម្តីគ្នាបង្កជាជំលោះនៅចំណុចភូមិទី១០ សង្កាត់បឹងសាឡាង ខណ្ឌទួលគោកកាលពីវេលាម៉ោងប្រមាណ១២:២០នាទីថ្ងៃទី៣ ខែវិច្ឆិកា ឆ្នាំ២០២៤។

ជនសង្ស័យឈ្មោសុខ សេន អាយុ៣១ឆ្នាំ មុខរបរអ្នកដឹកជញ្ជូន រស់នៅផ្ទះលេខ១០ជាន់ទី៦ អគារទី២ ផ្លូវ២១១ ភូមិ១២ សង្កាត់វាលវង់ ខណ្ឌ៧មករា ត្រូវបានឃាត់ខ្លួននៅវេលាម៉ោង១២:៣០នាទីថ្ងៃទី៤ ខែវិច្ឆិកា ឆ្នាំ២០២៤ បច្ចុប្បន្នជនសង្ស័យត្រូវបានកម្លាំងនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិនាំយកទៅសាកសួរនិងកសាងសំណុំរឿងចាត់ការតាមនីតិវិធី៕