(កំពង់ចាម)៖ និស្សិតពេទ្យស្រី២នាក់ជាបងប្អូនបង្កើតឈ្មោះ ប្រាច ចន្ទ្រា និង ប្រាច ចិត្ត្រា ត្រូវរថយន្តបែនដឹកដីបុកស្លាប់យ៉ាងអាណោចអាធ័មបំផុត កាលពីព្រឹកថ្ងៃទី២៨ ខែមីនា ឆ្នាំ២០២៥កន្លងទៅ នៅក្រុងកំពង់ចាម ខេត្តកំពង់ចាម ពេលដែលពួកគេទាំង២នាក់ កំពុងឌុបគ្នាទៅរៀន តែមកដល់ពេលនេះទាំងរថយន្តបង្ក និងអ្នកបើករថយន្តមិនទាន់ត្រូវបានចាប់ខ្លួនបាននោះទេ។
នារីរងគ្រោះទាំង២នាក់ ដែលកំពុងស្ថិតក្នុងវ័យសិក្សារស់នៅភូមិក្រសាំងខ ឃុំសាន់គ ស្រុកកំពង់ស្វាយ ខេត្តកំពង់ធំ ប៉ុន្តែពួកគេបានបន្តការសិក្សានៅសកលវិទ្យាល័យកំពង់ចាម ផ្នែកគ្រូពេទ្យដោយបងស្រីរៀននៅឆ្នាំទី៣ និងប្អូនស្រីរៀននៅឆ្នាំទី២។
ពេលដែលពួកគេទាំង២នាក់ បងប្អូនកំពុងឌុបគ្នាទៅរៀននោះ ស្រាប់តែបានជួបគ្រោះថ្នាក់ចរាចរណ៍បង្កឡើងដោយរថយន្តបែនដឹកដីធន់ធំបើកមកបុក និងកិនពីលើទាំងពីរនាក់យ៉ាងអាណោចអាធ័មជាទីបំផុត។
ក្រោយកើតហេតុភ្លាមៗ ជនរងគ្រោះទាំង២នាក់ ក៏ត្រូវបានគ្រួសារដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពង់ចាម និងបញ្ជូនបន្តទៅកាន់មន្ទីរពេទ្យកាលម៉ែត ប៉ុន្តែមិនអាចជួយសង្គ្រោះពួកគេបានឡើយ ពោលមជ្ជរាជនៅតែឆក់យកអាយុជីវិតពួកគេទាំង២នាក់ ដោយគ្មានក្តីមេត្តានោះទេ។
តាំងពីថ្ងៃកើតហេតុទី២៨ ខែមីនា ឆ្នាំ២០២៥ រហូតមកដល់ថ្ងៃទី៥ ខែមេសា ឆ្នាំ២០២៥ មន្ត្រីនគរបាលចរាចរណ៍ក្រុងកំពង់ចាម និងស្នងការដ្ឋាននគរបាលខេត្តកំពង់ចាម មិនទាន់រកឃើញរថយន្តបង្ក និងអ្នកបើក រថយន្តបង្កនៅឡើយទេ បើទោះបីជាមន្ត្រីនគរបាលចរចរណ៍ទាំងនោះ មានភស្តុតាងជាកាមេរ៉ាសុវត្ថិភាព មានសាក្សីបានឃើញផ្ទាល់ និងបានឆ្លើយបំភ្លឺក្នុងហេតុការណ៍នោះក៏ដោយ។
បើតាមសាក្សី និងការឆ្លើយបំភ្លឺនានា បានបង្ហាញថា រថយន្តបង្កពាក់ស្លាកលេខស្វាយរៀង 3A-1660 បើកបរដោយឈ្មោះ ញ៉ ចន្តា ភេទប្រុស អាយុ២៥ឆ្នាំ មានទីលំនៅភូមិត្រពាំងព្រះលាក់ ឃុំត្រពាំងព្រះ ស្រុកព្រៃឈរ ខេត្តកំពង់ចាម។ ជននេះជាអ្នកស៊ីឈ្នួលបើកឡានដឹកដីឱ្យម្ចាស់ឡានឈ្មោះ ហេង តុលា រស់នៅក្នុងខេត្តកំពង់ចាម ដែលបានព្យាយាមលាក់រថយន្តរបស់ខ្លួន ហើយមកដល់ពេលនេះ សមត្ថិកិច្ចមិនទាន់រកឃើញរថយន្តបង្ក និងអ្នកបើករថយន្តនោះទេ។
ក្រុមគ្រួសាររបស់ជនរងគ្រោះតាមរយៈបណ្តាញព័ត៌មាន Fresh News នៅថ្ងៃទី៥ ខែមេសា ឆ្នាំ២០២៥ បានទទូចឲ្យស្នងការនគរបាលខេត្តកំពង់ចាម ថ្នាក់ដឹកនាំខេត្ត និងព្រះរាជអាជ្ញាអមសាលាដំបូងខេត្ត ជួយអន្តរាគមន៍ តាមស្វែងរកចាប់ខ្លួន អ្នកបើករថយន្តបង្កមកដាក់ទោសឲ្យធ្ងន់ធ្ងរបំផុត។
សម្រាប់ករណីនេះ អធិការនគរបាលក្រុងកំពង់ចាម បានឲ្យឪពុកម្តាយជនរងគ្រោះដាក់ពាក្យបណ្តឹង ព្រមទាំងបានអញ្ជើញភាគីខាងជនរងគ្រោះ និងម្ចាស់ឡាន ចូលមកសម្របសម្រួលពាក់ព័ន្ធនឹងសំណង នៅអធិការដ្ឋាននគរបាល ក្រុងកំពង់ចាម ចំនួន២លើករួចមកហើយ ដោយលើកទី១ គឺនៅថ្ងៃទី៣១ ខែមីនា ឆ្នាំ២០២៥ និងលើកទី២ នៅថ្ងៃទី៣ ខែមេសា ឆ្នាំ២០២៥ ប៉ុន្តែការចរចានេះមិនទទួលបានការឯកភាពគ្នានោះទេ ដោយខាងភាគីជនបង្កសងសំណង ត្រឹម៧ពាន់ដុល្លារ ដែលមិនអាចទទួលយកបាន ព្រោះបាត់បង់កូនស្រីទាំង២នាក់ដែលរកថ្លែងមិនចេញនោះទេ ហើយការឈឺចាប់នេះបានស្ថិតនៅមួយជីវិតតែម្តង៕
