រថយន្ដ​ford ប្រលះខ្ទិចអស់ដើមផ្កា និងប៉ាណូដ៏ធំនៅកណ្ដាលផ្លូវ បណ្ដាលឲ្យរងការខូចខាតយ៉ាងដំណំ
-

ភ្នំពេញ៖ រថយន្ដ​ម៉ាកfordមួយ​គ្រឿង ដែលអ្នកម្ចាស់បានបើក​បរ​ក្នុង​ល្បឿន​យ៉ាងលឿន​ ហើយបាន​បើក​បុកឡើង​លើ​ខឿន​សួន​ច្បារកណ្ដាលផ្លូវ និងបុកដើមផ្កាបាក់អស់ជាច្រើនដើម ព្រមទាំងបុកបង្គោលស្លាកប៉ាណូដ៏ធំបាក់អស់មួយដើមទៀត បណ្ដាលឲ្យរងការខូចខាតយ៉ាងដំណំ តែសំណាងល្អមិនបានបង្កឲ្យមានមនុស្សរងរបួស ។

‎ ករណីគ្រោះថ្នាក់ចរាចរណ៍ខាងលើនេះដែរ បានកើតឡើងនៅវេលាម៉ោង៤ និង១០នាទីយប់ ថ្ងៃទី២០ ខែមេសា ឆ្នាំ២០១៨ នៅចំណុចមុខបុរី ហ្គ្រេនជ្រោយចង្វារ តាមបណ្ដោយផ្លូវជាតិលេខ6A ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។ ‎
រថយន្តបង្កហេតុម៉ាក Ford ពណ៌ស ពាក់ស្លាកលេខភ្នំពេញ 2F-9266 ដែលបើកបរដោយបុរសម្នាក់ និងរួមដំណើរដោយបុរស២នាក់ទៀតជាមួយគ្នា ។
យោងតាមប្រភពព័ត៌មានពីប្រជាពលរដ្ឋបានប្រាប់ឲ្យដឹងថា នៅពេលកើតហេតុគឺ រថយន្តបង្ក បានធ្វើដំណើរតាមបណ្ដោយផ្លូវជាតិលេខ6A ទិសដៅពីជើងមកត្បួង ក្នុងល្បឿនយ៉ាងលឿង ខណៈមកដល់ចំណុចកើតហេតុ ក៏រេចង្កូតបុកខឿន​ឡើងលើសួន​ច្បារកណ្ដាលផ្លូវ និងបុកដើមផ្កាបាក់អស់ចំនួន៣ដើម ព្រមទាំងបុកបង្គោលស្លាកប៉ាណូដ៏ធំបាក់អស់មួយដើមទៀត បណ្ដាលឲ្យរងការខូចខាតយ៉ាងដំណំ ចំណែករថយន្តបង្កវិញ ក៏បានដាច់កង់មុខចេញពីរថយន្ត និងតួខាងមុខរងការខូចខាតទាំងស្រុង តែសំណាងល្អមិនបានបង្កឲ្យមានមនុស្សរងរបួស ។
‎ ក្រោយកើតហេតុ មនុស្សដែលជិះលើរថយន្តបានចុះគេចខ្លួនបាត់អស់ ដោយបន្សល់ទុករថយន្តនៅនិងកន្លែងកើតហេតុ ។ បន្ទាប់មក ក៏មានសមត្ថកិច្ចមូលដ្ឋានបានចុះមកធ្វើការវាស់វែងយករថយន្តបង្កទៅរក្សាទុក នៅការិយាល័យចរាចរណ៍ជើងគោករាជធានីភ្នំពេញ រងចាំម្ចាស់រថយន្តចូលខ្លួនមកដោះស្រាយតាមផ្លូវច្បាប់ ៕
ដោយ៖ ភារ៉ា