កំពង់ឆ្នាំង ៖ នៅវេលាម៉ោង១០​និង​២០​នាទី​ព្រឹក ថ្ងៃ​ទី​២ ខែមិថុនា ឆ្នាំ​២០១៨ កុមារី​អាយុ​១០​ឆ្នាំ​ម្នាក់ ​បាន​លង់ទឹក​ស្រះ​ស្លាប់ ខណៈ​ទៅ​ងូតទឹក​ស្រះ​នៅ​ក្នុង​សាលា​វិទ្យាល័យ ហ៊ុន​សែន កំពង់ត្រឡាច​ ស្ថិតនៅ​ ភូមិ​សាលា​លេខ​ប្រាំ ឃុំ​អូរ​ឫស្សី ស្រុក​កំពង់​ត្រឡាច ខេត្តកំពង់ឆ្នាំង។

កុមារី​រង​គ្រោះ​មានឈ្មោះ សុខ ស៊ី​ណា​វី អាយុ​១០​ឆ្នាំ មាន​ឪពុក​ឈ្មោះ សុខ ចំរើន ម្ដាយ​ឈ្មោះ កែវ សុខា មាន​ទីលំនៅ​ភូមិ​សាលា​លេខ​ប្រាំ ឃុំ​អូរ​ឫស្សី ស្រុក​កំពង់​ត្រឡាច មាន​មុខរបរ​លក់ដូរ នៅ​សាលា​វិទ្យាល័យ​កើតហេតុ​ខាងលើ ។ បើតាមសម្តីសមត្ថកិច្ចបានប្រាប់ឲ្យដឹងថា មុន​ពេល​កើតហេតុ​ កុមារី​រង​គ្រោះ​បាន​ទៅ​លេង​ស្រះ​ទឹក​ក្នុង​សាលា​​ជាមួយ​ក្មេង​ៗ​ច្រើន​នាក់​ទៀត​ ពេល​នោះ​ក្មេង​ស្រី​រង​គ្រោះ​បាន​រអិល​ធ្លាក់​ចូល​ទឹក​ជ្រៅ​ បណ្ដាល​​ឲ្យ​លង់ ខណៈពេលនោះ​ក្មេង​ៗ​ ដែល​លេង​ទឹកជា​មួយ​ក៏​បានរ​ត់ទៅ​ហៅ​ឪពុក​ម្ដាយ ​ដែល​កំពុង​ទៅ​លក់ដូរ នៅ​ក្នុង​សាលា​តែ​ទម្រាំ​មនុស្ស​ចាស់​ទៅ​ដល់​ហើយ​ចុះ​ទៅ​រាវរក​ឃើញ​កុមារី​រង​គ្រោះ​បាន​លង់ទឹក​ស្លាប់​បាត់​ហើយ ។ ដោយហេតុមិនអស់ចិត្តឪពុក​ម្ដាយ​ រួម​ជាមួយ​សមត្ថកិច្ច​ ​ក៏​បាន​នាំ​កុមារី​រង​គ្រោះ​ទៅ​សង្គ្រោះ​នៅ​មណ្ឌល​សុខភាព​ស្រុក​កំពង់ត្រឡាច ​​គ្រូពេទ្យ​ប្រាប់​ថា នាង​បាន​ស្លាប់​ទៅ​ហើយ ​រួច​បាន​ប្រគល់​សព​កុមារី​រង​គ្រោះ​ទៅ​ក្រុម​គ្រួសារ​យក​ទៅ​ធ្វើបុណ្យ​តាម​ប្រពៃណី ៕ ដោយ៖ និស្ស័យ