ភ្នំពេញ ៖ ចោរ១ក្រុមបានចូលទៅ ធ្វើសកម្មភាពគាស់ទូដែកនៅរោងចក្រផលិតស្បែកជើង «ម៉ារូ ឈុន» ដែលមានទីតាំងស្ថិតនៅក្បែរផ្សារទួលពង្រ ភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ ។ បង្កឲ្យមានការភ្ញាក់ផ្អើលកាលពីវេលាម៉ោង៨ព្រឹក ថ្ងៃទី០៣ ខែមិថុនា ឆ្នាំ២០១៨ បន្ទាប់ពីថៅកែចូលទៅដល់រោងក្ររបស់ខ្លួន ហើយបានប្រទះឃើញទូដែកត្រូវគាល់ទម្លុះទម្លាយខ្ទេចខ្ទីររួចក៏បានប្ដឹងឲ្យនគរបាលចុះទៅពិនិត្យភ្លាមៗដែរ។

តាមប្រភពព័ត៌មានបានឲ្យដឹងថា ក្រោយពេលទៅដល់ក្នុងរោងចក្រខាងលើនគរបាលបានត្រួតពិនិត្យមើលកាមេរ៉សុវត្ថិភាព ហើយបានឃើញក្រុមចោរមានគ្នាច្រើន។ មិនតែប៉ុណ្ណោះពួកចោរទាំងនេះបានកាត់របងលួសបន្លាផ្នែកចំហៀងរោងចក្ររួចបានផ្លោះចូលទៅគាស់ទូដែល នាវេលាម៉ោង២និង៥០នាទីទៀបភ្លឺ ថ្ងៃទី៣ ខែមិថុនា ឆ្នាំ២០១៨ ។ បន្ទាប់ពីធ្វើសកម្មភាពបានសម្រេចក្រុមចោរខាងលើបានរត់ចេញគេចខ្លួនតាមផ្លូវដដែលនោះវិញនិងគេចខ្លួនបាត់ដោយសុវត្ថិភាព។ តាមអ្នកបកប្រែភាសាចិនប្រចាំនៅរោងចក្រខាងលើបាននិយាយថា ទូដែកដែលត្រូវចោរគាស់នោះមានចំនួន២គឺទី១ទូដែកដាក់លុយ និងទី២គឺទូដែកដាក់ឯកសារ។ ហើយលុយនៅក្នុងទូដែកប្រហែលមិនសូវមានច្រើននោះទេព្រោះលុយដែលទុកសម្រាប់បើកឲ្យកម្មករនាប៉ុន្មានថ្ងៃខាងមុខនេះ មិនទាន់ត្រូវបាននាំយកទៅទុកនៅក្នុងនោះនៅឡើយ។ ប្រភពៈ កូន ខ្លាតូច