ស្រុកព្រៃនបៈ នៅថ្ងៃទី៣ ខែមិថុនា ឆ្នាំ២០១៨នេះ លោកឧកញ៉ាទៀ វិចិត្របាននាំយកថវិកាចំនួនមួយលានរៀល ទៅជូនគ្រួសារលោកតា លោកយាយវ័យជរាមួយគ្រួសារ ក្នុងនោះលោកតា មានវ័យ១១០ឆ្នាំទៅហើយគិតមកដល់ឆ្នាំ២០១៨នេះ ចំណែកលោកយាយជាភរិយាមានវ័យ៨០ឆ្នាំ។

គ្រួសារលោកតាលោកយាយវ័យជរានេះ លោកតាឈ្មោះអ៊ុម ងិន រីឯលោកយាយឈ្មោះអេត យ៉េន បច្ចុប្បន្ន ជាគ្រួសារក្រីក្រលំបាកសព្វថ្ងៃរស់នៅផ្ទះខ្ទម លើដីចំណីប្រឡាយទឹករបស់រដ្ឋស្ថិតក្នុងភូមិ ចំណោតរាមឃុំបិតត្រាំង ស្រុកព្រៃនប់ខេត្តព្រះសីហនុ។ បើតាមការរៀបរាប់ពីលោកតាថា សព្វថ្ងៃបើទោះជាមានវ័យជរាណាស់ទៅហើយក្តី ប៉ុន្តែលោកតានៅប្រកបរបរដាក់លប ដាក់ទ្រូតាមប្រឡាយក្បែរផ្ទះយកក្តាម ខ្យងទៅលក់ចិញ្ចឹមខ្លួន ដោយសារតែពុំមានកូនចៅនៅជាមួយ។ លោកឧកញ៉ាទៀ វិចិត្រមានប្រសាសន៍ថា នេះជាការផ្តល់ជំនួយជូនគ្រួសារលោកតា លោកយាយជាលើកទី២ហើយ ដែលលើកទី១លោកឧកញ៉ា បាននាំយកថវិកានិងម្ហូបអាហារជូនលោកតាលោកយាយបានម្តងដែរ កាលពីថ្ងៃទី៣០ ខែមេសា ឆ្នាំ២០១៦។ ក្រោយបានទទួលជំនួយជាលើកទី២នេះ ជាមួយនឹងការរំភើបរហូតដល់សម្រក់ទឹកភ្នែក លោកតាបានថ្លែងអំណរគុណដល់លោកឧកញ៉ាទៀ វិចិត្រដែលបានជួយឧបត្ថម្ភគ្រួសារលោកតា ក្នុងពេលដែលគ្រួសារលោកតាកំពុងជួបការលំបាក ក្នុងវ័យជរា គ្មានកូនចៅនៅជិត៕ ប្រភពៈ Huy Bunleng