នារីវ័យក្មេងសាច់ស២នាក់ជិះម៉ូតូឌុបគ្នាយ៉ាងលឿន ជ្រុលទៅបុកឃឿនក្រោមស្ពានស្ទឹងមានជ័យ បណ្ដាលឲ្យរបួសធ្ងន់ទាំង២នាក់
- 1768

ភ្នំពេញ ៖ នារីរូបស្រស់២នាក់ ជិះម៉ូតូឌុបគ្នាយ៉ាងលឿន ជ្រុលទៅបុកឃឿនផ្លូវត្រង់ចំណុចផ្លូវកោងនៅខាងក្រោមស្ពានអាកាសស្ទឹងមានជ័យ បណ្ដាលឲ្យរបួសធ្ងន់ទាំង២នាក់ ហើយត្រូវបានរថយន្តសង្គ្រោះបន្ទាន់របស់មន្ទីពេទ្យឯកជន ហុងហាក់ ដឹកយកទៅសង្គ្រោះភ្លាមៗ ។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង២ និង៣០នាទីរំលងអាធ្រាត ឈានចូលថ្ងៃទី១៦ ខែសីហា ឆ្នាំ២០១៨ ស្ថិតនៅខាងក្រោមស្ពានអាកាសស្ទឹងមានជ័យ ក្នុងសង្កាត់បឹងសាឡាង ខណ្ឌទួលគោក ជាប់ព្រុំប្រទល់សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
យោងតាមសម្ដីប្រជាពលរដ្ឋដែលឃើញហេតុការណ៍ជាក់ស្ដែង បានប្រាប់ឲ្យដឹងថា មុនពេលកើតហេតុ គេឃើញនារីរងគ្រោះ២នាក់ ជិះម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ ស៊េរី២០១៣ ពាក់ស្លាកលេខ ភ្នំពេញ 1CF-2569 បានជិះឌុបគ្នាចុះពីលើស្ពានអាកាសស្ទឹងមានជ័យ ទិសដៅពីត្បូងមកជើង ក្នុងល្បឿនយ៉ាងលឿន ខណៈមកដល់ចំណុចផ្លូវកោងមិនបន្ថយល្បឿន ក៏ជ្រុលចង្កូតទៅបុកឃឿននៅខាងក្រោមស្ពាន បណ្ដាលឲ្យដួលអូសជាង១០ម៉ែត្រ រងរបួសធ្ងន់ទាំង២នាក់ រីឯម៉ូតូរងការខូចខាតតិចតួច ។
ក្រោយកើតហេតុ ប្រជាពលរដ្ឋដែលឃើញហេតុការណ៍នេះ បានទាក់ទងទៅរថយន្តសង្គ្រោះបន្ទាន់របស់មន្ទីពេទ្យឯកជន ហុងហាក់ ចុះមកដឹកជនរងគ្រោះទៅសង្គ្រោះភ្លាមៗ ។ដោយឡែកម៉ូតូរបស់នារីរងគ្រោះ ត្រូវបានសមត្ថកិច្ចនគរបាលប៉ុស្ដិ៍បឹងសាឡាង យកទៅរក្សាទុក រងចាំប្រគល់ជូនទៅម្ចាស់វិញ ៕
ដោយ៖ ភារ៉ា