ក្ដៅ!!! លោក អ៊ិន សុភិន និងឲ្យមេធាវីចាត់ការតាមច្បាប់ រឿងលោកហង្ស សម្បើមស័ក្ដ មិនមកបំពេញការងារថតរឿងតាមពេលវេលា និងបង្ខូចឈ្មោះផលិតកម្ម

ភ្នំពេញៈ ក្រោមពីរមានសារបង្ហោះ នៅលើបណ្ដាញសង្គមហ្វេសបុក របស់តារាសម្ដែងលោក ហង្ស សម្បើមស័ក្ដ បានធ្វើឱ្យមានការភ្ញាក់ផ្អើលនៅក្នុងស្រទាប់មហាជនយ៉ាងខ្លាំង ដោយសារតែលោកបានបង្ហោះសារយ៉ាងរសើបដោយចោទថា ផលិតកម្មមហាហង្សមិនព្រមបើកលុយឱ្យលោកដូចគ្នានឹងតារាសម្ដែងកញ្ញា ណាក់ ស្រីណា ដែលធ្លាប់វាយប្រហារផលិតកម្មមហាហង្សកន្លងមក។

យ៉ាងណាមិញ ការបង្ហោះសាររបស់លោកហង្ស សម្បើមស័ក្ដ បានធ្វើឱ្យលោក អ៊ិន សុភិន បង្ហោះជាចំហរនូវបណ្ដឹងដែលចេញដោយមេធាវី ដោយក្នុងបណ្ដឹងនោះបានអះអាងថា លោក ហង្ស សម្បើមស័ក្ដ មិនមកបំពេញការងារថតរឿង «សង្គ្រាមមរតក» នោះទេ ហើយបានធ្វើឱ្យភាពយន្តមួយនេះ ត្រូវគេកាត់ឈុតចោលទៀត។ លោក អ៊ិន សុភិន ចាងហ្វាងផលិតកម្មមហាហង្ស បានអះអាងទៀតថា ហេតុផលដែលខាងមហាហង្សមិនព្រមបើកលុយ៥០ភាគរយឱ្យលោក ហង្ស សម្បើមស័ក្ដ គឺបណ្ដាលមកពីលោកមិនបានមកថតភាពយន្តរឿង «សង្គ្រាមមរតក» ឱ្យចប់សព្វគ្រប់តាមអ្វីដែលបានព្រមព្រៀងនោះទេ ដោយភាពយន្តទាំងមូលមានចំនួន៥០ភាគ តែភាពយឺតយ៉ាវដែលបណ្ដាលមកពីលោក ហង្ស សម្បើមស័ក្ដ មិនមានពេលថតឱ្យគ្រប់គ្រាន់ ទើបធ្វើឱ្យក្រុមហ៊ុនសម្រេចចិត្តកាត់ប្លង់មួយចំនួនចោល ហើយថតបានតែ៣៨ភាគឱ្យខាងទូរទស្សន៍វិញ។

លោកអ៊ិន សុភិន បានបញ្ចេញឯកសារបណ្ដឹងមួយ ដែលមេធាវីតំណាងឱ្យក្រុមហ៊ុន បានជូនដំណឹងឱ្យលោក ហង្ស សម្បើមស័ក្ដ មកបំពេញការងារឱ្យចប់សព្វគ្រប់ ដើម្បីកុំឱ្យមានការសងថ្លៃខូចខាតរបស់ផលិតកម្ម ឬត្រូវបង្កក់ប្រាក់កម្រៃមិនទាន់បើក។ លោកបន្តថា តួដែលក្រុមហ៊ុនពិបាករឿងលុយ គឺសំដៅតែតួដែលធ្វើឱ្យក្រុមផលិតករពិបាកប៉ុណ្ណោះ ដោយលោកបានអះអាងថា បើតួដែលមកថតមិនទៀងទាត់ក៏ខាងផលិតកម្មពិបាករឿងលុយដែរ ប្រហែលជាខាងផលិតកម្មត្រូវបិទទ្វារហើយ។

យ៉ាងណាមិញ លោកថា ខ្លួនសុខចិត្តដំកល់បណ្ដឹងនោះ ដោយនៅតែប្រកាន់ជំហរបើកលុយឱ្យគ្រប់ដដែល ដោយគ្រាន់តែសម្រេចចិត្តបង្កក់ឱ្យយូរបន្ដិតប៉ុណ្ណោះ ដើម្បីឱ្យបានដឹងថា បើពេលថតរឿងធ្វើបាបផលិតករ គឺផលិតករត្រូវធ្វើបាបវិញពេលសុំបើកលុយ។ ប៉ុន្តែផ្អែកតាមការបង្ហោះធ្វើឱ្យប៉ះពាល់ដល់កិត្តិយសរបស់លោក និងក្រុមហ៊ុនរបស់លោកនេះ គឺលោកនឹងធ្វើតាមច្បាប់ ដោយសារតែអះអាងថា លោកហង្ស សម្បើមស័ក្ដ ក៏ធ្វើឱ្យភាពយន្តរឿង «សង្គ្រាមមរតក» របស់លោកខាតបង់ជាច្រើន ព្រោះតែការរវល់មិនថតបានទៀងទាត់។

គេមិនទាន់ដឹងថា តើតារាសម្ដែង លោក ហង្ស សម្បើមស័ក្ដ នឹងមានប្រតិកម្មយ៉ាងណាចំពោះការវាយបកខាងលើយ៉ាងណានោះទេ ក្រោយពីសារដែលលោកប្រកាសទារលុយផលិតកម្មមហាហង្ស បានក្លាយជាប្រធានបទដ៏រសើបនៅក្នុងពេលនេះ៕