កម្លាំងនគរបាលជាតិ សម្រេចបិទអាជីវកម្ម ក្រុមហ៊ុនចិនអត់ច្បាប់ដ៏ធំមួយ នៅខណ្ឌដូនពេញ ដើម្បីបញ្ជៀសហានិភ័យប្រជាពលរដ្ឋ កុំឲ្យចាញ់បោកអស់លុយកាក់ ដោយមិនដឹងខ្លួន

ភ្នំពេញៈ កាលពីពេលថ្មីៗនេះ កម្លាំងនគរបាល នៃអគ្គស្នងការដ្ឋាននគរបាលជាតិ សម្រេចបិទអាជីវកម្ម ក្រុមហ៊ុនចិនអត់ច្បាប់ដ៏ធំមួយឈ្មោះ ឌីជីថល អ៊ិនធឺណេសិនណល អ៊ែសេត ត្រេឌីង សេនអឺ (BTKTrade Digital International Assets Trading Center) មានអាស័យដ្ឋានអគារលេខ៤៨ ផ្លូវលេខ៨៤ សង្កាត់ស្រះចក ខណ្ឌដូនពេញ រាជធានីភ្នំពេញ។ ដើម្បីបញ្ជៀសហានិភ័យប្រជាពលរដ្ឋ ចាញ់បោកអស់លុយកាក់ដោយមិនដឹងខ្លួន។

ប្រតិបត្តិការខាងលើនេះ បានធ្វើឡើងនៅចុងសប្តាហ៍កន្លងទៅ ដោយមានសមាសភាពចូលរួមពីក្រុមការងារធនាគារជាតិ នៃកម្ពុជា គណៈកម្មការមូលបត្រកម្ពុជា និងកម្លាំងនគរបាល នៃអគ្គស្នងការដ្ឋាននគរបាលជាតិ បានសហការធ្វើការត្រួតពិនិត្យកិច្ចការការងាររដ្ឋបាល ដោយយោងតាមសេចក្ដីថ្លែងការណ៍រួម ចុះថ្ងៃទី១១ ខែឧសភា ឆ្នាំ២០១៨ រវាងធនាគារជាតិ នៃកម្ពុជា គណៈកម្មការមូលបត្រកម្ពុជា និងអគ្គស្នងការដ្ឋាននគរបាលជាតិ ស្តីពីការជួញដូរ លក់ដូរ និងគៀងគរប្រជាពលរដ្ឋដាក់ប្រាក់វិនិយោគដោយគ្មានច្បាប់អនុញ្ញាត។

ក្រុមការងារបានចុះពិនិត្យនៅទីតាំងល្មើសផ្ទាល់ ជួបតំណាងក្រុមហ៊ុន ឈ្មោះ Ding Nan (Anna) ភេទស្រី ជនជាតិចិន ជាប្រធានរដ្ឋបាល និងឈ្មោះ Liu Xu ភេទប្រុស ជនជាតិចិន ជាបុគ្គលិករដ្ឋបាល និងឈ្មោះ ហ៊ី សុងឆាយ ជនជាតិខ្មែរ ជាអ្នកបកប្រែខ្មែរចិន និងបានពិនិត្យឃើញ កុំព្យូទ័រចំនួន២៩៨គ្រឿង ដែលជាឧបករណ៍ដើម្បីប្រព្រឹត្តអាជីវកម្ម។

លោកឧត្តមសេនីយ៍ទោ មៀច ដេវីត បានបញ្ជាក់ថា ប្រជាពលរដ្ឋដែលមក វិនិយោគតាមប្រព័ន្ធ blockchain នឹង កាសអេលិចត្រូនិក គឺវាមានហានិភ័យខ្ពស់ណាស់ ដោយសារការយល់ដឹងរបស់ប្រជាពលរដ្ឋ មួយចំនួន មានការយល់ដឹងទៅលើបច្ចេកវិជ្ជាថ្មីនេះ នៅមានកម្រិត ហើយប្រជាពលរដ្ឋងាយទទួលការអូសទាញ ចាញ់បោកដោយសារក្រុមហ៊ុនប្រមូលលុយកាក់ ចុះបើថៅកែវិចលុយរបស់អ្នកវិនិយោគរត់បាត់ តើនាក់ណាទទួលខុសត្រូវ? ៕