ប៉ូលិសអន្តោប្រវេសន៍ ខេត្តព្រះសីហនុ បញ្ជូនខ្លួនជនសង្ស័យជនជាតិអាមេរិកកាំងម្នាក់ ឲ្យទៅស្ថានទូតប្រចាំកម្ពុជាវិញ ដើម្បីធ្វើការកាត់ទោស ក្រោយពីជនសង្ស័យ បានចាប់រំលោភកុមារជាច្រើនអ្នក នៅសហរដ្ឋអាមេរិក

ព្រះសីហនុៈ កាលពីយប់ថ្ងៃទី២៩ ខែសីហា ឆ្នាំ២០១៨ ជនជាតិអាមេរិកកាំងម្នាក់ ត្រូវបានប៉ូលិសអន្តោប្រវេសន៍ ខេត្តព្រះសីហនុ ធ្វើការឃាត់ក្រោយពីជនសង្ស័យ បានរំលោភផ្លូវភេទលើកុមារ ជាច្រើននៅសហរដ្ឋអាមេរិក រួចរត់មកពួនសម្ងំលាក់ខ្លួននៅ ខេត្តព្រះសីហនុ។ ជនសង្ស័យខាងលើមានឈ្មោះ William David BRENNER។ ការចាប់ខ្លួននេះ គឺបន្ទាប់ពីមានការស្នើសុំរបស់ការិយាល័យសន្តិសុខភូមិភាគ (RSO) របស់ស្ថានទូតសហរដ្ឋអាមេរិក ប្រចាំកម្ពុជា រួចបញ្ជូនមកភ្នំពេញ។

យោងតាមលិខិតរបស់ការិយាល័យសន្តិសុខភូមិភាគ របស់ស្ថានទូតសហរដ្ឋអាមេរិកប្រចាំកម្ពុជា ផ្ញើជូនសម្តេច ស ខេង កាលពីថ្ងៃទី២៣ ខែសីហា បានឲ្យដឹងថា ការិយាល័យសន្តិសុខភូមិភាគ បានទទួលព័ត៌មានថា ពលរដ្ឋអាមេរិកាំងឈ្មោះ William David BRENNER មានដីកាចាប់ខ្លួនដែលមានសុពលភាព ពាក់ព័ន្ធបទរំលោភ បំពានផ្លូវភេទជាបន្តបន្ទាប់ទៅលើកុមារ។

បច្ចុប្បន្ន ការិយាល័យសន្តិសុខភូមិភាគ បាននឹងកំពុងធ្វើការ ជាមួយនឹងស្ថាប័នពាក់ព័ន្ធ របស់សហរដ្ឋអាមេរិក ដើម្បីបញ្ជូនខ្លួនជនល្មើស ត្រឡប់ទៅសហរដ្ឋអាមេរិកវិញ ដើម្បីធ្វើការកាត់ទោស ៕