ភ្នំពេញ៖ តារាចម្រៀងវ័យក្មេងឡុង លីគ័ង្គ ជាអតីតកម្មវិធីប្រឡងចម្រៀងកុមារ The Voice Kid Cambodia កំពុងតែទទួលបានការចាប់អារម្មណ៍ពីបណ្តាអ្នកគាំទ្រជាច្រើននៅក្នុងប្រទេស ទោះបីជារូបប្អូនមានវ័យក្មេង និងទើបតែឈានជើងចូលសិល្បៈក្តីហាក់លោតខ្ពស់ឡើងពីមួយថ្ងៃទៅមួយ ដែលមើលទៅមិនចាញ់ម្ចាស់ពាន ពេជ្រ ថៃ ប៉ុន្មាននោះទេ។

ជាមួយគ្នានេះដែរ ឡុង លីគ័ង្គ សម្តែងក្តីរំជើបរំជូល លើនាមមរតកសិល្បៈ ល្ខោនខោល ស្ថិតនិងវិនាទីចុងក្រោយចាំអ៊ុតលទ្ធផលពីអង្គការ យូណេស្កូ កុមារាសិល្បៈរូបនេះធ្វើឲ្យប្រជាជាតិកំណើតផ្ទុះក្តីរំភើប ស្ទើមិនដឹងខ្លួន ពេលឮសំដី កុមារាជុំវិញក្តីទន្ទឹងលើលទ្ធផលចុងក្រោយស្តីពីជោគវាសនា មរតកសិល្បៈបុរាណមួយនេះ។ យ៉ាងណាមិញ ឯកឧត្តម ថៃ នរៈសត្យា រដ្ឋលេខាធិការ និងជាអ្នកនាំពាក្យក្រសួងវប្បធម៌ និងវិចិត្រសិល្បៈ បានបញ្ជាក់ឱ្យដឹងនៅថ្ងៃទី៣០ ខែសីហា ឆ្នាំ២០១៨នេះថា កម្ពុជាគ្មានការព្រួយបារម្ភឡើយ ដោយសារកម្ពុជាមានឯកសារជាមូលដ្ឋានគ្រប់គ្រាន់ដែលបញ្ជាក់ថា ល្ខោនខោលជារបស់ខ្មែរ ជាពិសេសកម្ពុជាបានដាក់ពាក្យស្នើសុំទៅអង្គការយូណេស្កូមុនប្រទេសថៃ។ ឯកឧត្តមបាន អះអាងថា ល្ខោនខោលខ្មែរ មានលក្ខណៈខុសគ្នាស្រឡះពីល្ខោនខុនរបស់ថៃ ដោយសារ លក្ខណៈរាំ និងក្បាច់ មានភាពខុសគ្នា ឬគ្រាន់តែស្រដៀងគ្នាតិចតួចតែប៉ុណ្ណោះ។ គួររំលឹក នៅប៉ុន្មានថ្ងៃចុងក្រោយនេះ ព័ត៌មានជាច្រើនបង្ហាញនៅលើបណ្តាញសង្គមថា អង្គការ UNESCO នឹងសម្រេចជោគវាសនាល្ខោនខោល ថាជារបស់កម្ពុជា ឬជារបស់ថៃ នោះ គេសង្កេតឃើញថាមានតារាល្បីៗជាច្រើននៅក្នុងប្រទេសកម្ពុជាកំពុងគិតគូអំពីបញ្ហានេះផងដែរ ស្របពេល ដែលអ្នកនាំពាក្យក្រសួងវប្បធម៌ និងវិចិត្រសិល្បៈ បង្ហាញក្តីសង្ឃឹមយ៉ាងមុតមាំថា អង្គការយូណេស្កូ នឹងចុះបញ្ជីល្ខោនខោលជាសម្បត្តិវប្បធម៌តាមសំណើរបស់កម្ពុជា។ ក្នុងវិនាទីចាំអ៊ុតលទ្ធផល ដ៏ក្តុកក្តូលនេះ តារាចម្រៀងវ័យកុមារភាព ឡុង លីគ័ង្គ ក៏បញ្ចេទស្សនៈរបស់ខ្លួន បង្ហាញនៅលើគណនីហ្វេសប៊ុកក្នុងសំណេរៀបរាប់ខ្លីថា «ទឹកភ្នែកខ្ញុំស្រក់ដើម្បីសុំឲ្យ UNESCO កុំបញ្ចូលវប្បធម៌សិល្ប:របាំរបស់កម្ពុជា ទៅឲ្យសៀមអី សុំបងប្អូនប្រជាជនកម្ពុជា ជួយ share ម្នាក់មួយ ដើម្បីឲ្យ UNESCO កាត់សេចក្តីឲ្យល្ខោនខោល ជារបស់កម្ពុជា»។