ភ្នំពេញៈ កាលពីយប់មិញថ្ងៃទី៣០ ខែសីហា លោកជំទាវ ស្រីតូច ចំណាន បានប្រារព្ធកម្មវិធីខួបកំណើតឲ្យ លោកឧកញ៉ាគិត ម៉េង ដែលត្រូវជាស្វាមី យ៉ាងរំភើបរីករាយមែនទែន ជាមួយនិងអ្នកចូលរួម សុទ្ធតែជាអ្នកមានជំនួញធំ។ នេះបើការបង្ហោះនៅលើបណ្ដាញសង្គមហ្វេសប៊ុក របស់អ្នកដែលបានចូលរួមកាលពីយប់មិញនេះ។

ជាក់ស្ដែង ក្រោយពីអតីតតារាសម្ដែង និង ជាពិធីការិនី លោកជំទាវ ស្រីតូច ចំណាន បានចាកឆ្ងាយពីជីវិត ជាអ្នកសិល្បៈ និងរស់នៅយ៉ាងមានក្ដីសុខ ជាមួយនឹងស្វាមី របស់ខ្លួនដែលមាន ទស្សនិកជន យ៉ាងច្រើនបានស្គាល់ថា ជាសេដ្ឋីដែលមានចិត្តធម៌ នោះគឺលោកឧកញ៉ាគិត ម៉េង។ ក្នុងនោះផងដែរ គេសង្កេតឃើញថា លោកជំទាវ ស្រីតូច ចំណាន តែងបង្ហោះរូបភាពបង្ហាញពីទំនាក់ទំនង យ៉ាងរឹងមាំ ជាមួយនឹងស្វាមី របស់ខ្លួន។ តែអ្វីដែលគួរឲ្យ ចាប់អារម្មណ៍ខ្លាំងនោះគឺ លោកជំទាវ ស្រីតូច ចំណាន បានបង្ហាញពីភាពផ្អែមល្ហែម ទៅកាន់លោកឧកញ៉ាគិត ម៉េង ដែលមើលទៅពិតជា ស្រលាញ់គ្នា ពោរពេញទៅដោយភាពកក់ក្តៅ៕