សៀមរាបៈ លោក អាគីរ៉ា គឺជាជនជាតិកម្ពុជាមួយរូបត្រូវបានទូរទស្សន៍ CNN ជ្រើសរើសចូលរួមប្រកួតប្រជែងក្នុងកម្មវិធី «បុរសឆ្នើម» ឬហៅថា Hero បន្ទាប់ពីរូបលោកបានចូលរួមក្នុងសកម្មភាពបោសសំអាតមីនដោយស្ម័គ្រចិត្ត។ កាលពីឆ្នាំ២០១០កន្លងទៅ អាគីរ៉ា បានក្លាយជាបេក្ខជន ១០រូបចុងក្រោយក្នុងកម្មវិធីរបស់ CNN បន្ទាប់ពីឆ្លងកាត់ការប្រកួតជ្រើសរើសបេក្ខជនរាប់ពាន់នាក់។ បុរសដែលបានសាងភាពល្បាញល្បីលើពិភពលោកតាមរយៈកញ្ចក់ទូរទស្សន៍ CNN រូបនេះ ត្រូវបានកម្លាំងនគរបាលខេត្តសៀមរាបឃាត់ខ្លួនបញ្ជូនទៅកាន់តុលាការហើយ ក្រោមការចោទប្រកាន់ថា បានលាក់ទុកអាវុធខុសច្បាប់។

នៅវេលាម៉ោង១២ៈ៣០នាទីថ្ងៃត្រង់ ថ្ងៃទី២៧ ខែសីហា ឆ្នាំ២០១៨ មានករណីអគ្គិភ័យឆេះ ក្រោយពេលមានហេតុការណ៏ផ្ទុះគ្រាប់បែក នៅអង្កការដែលមានឈ្មោះថា «សារៈមន្ទីគ្រាប់មីនកម្ពុជា» របស់លោក អាគីរ៉ា បន្ទាប់មកកម្លាំងនគរបាលស្រុកបន្ទាយស្រី បានធ្វើការគ្រប់គ្រងហេតុការណ៍ បាននៅម៉ោង១៤ៈ០០ ដោយមានការសហការណ៍ ពីកម្លាំងស្នងការនគរបាលខេត្ត និងកម្លាំងអធិការនគរបាលស្រុកអង្គរធំ។ របាយការណ៍បន្តថា ក្រោយពេលពន្លត់បាន កម្លាំងជំនាញផ្នែកគ្រប់គ្រងអាវុធជាតិផ្ទុះខេត្ត បានត្រួតពិនិត្យឃើញមានដូចជា គ្រាប់បែកដៃ ចំនួន៩គ្រាប់ មីន៧២A ចំនួន១៥គ្រាប់ គ្រាប់កាំភ្លើងខ្លីចំនួន ៣២៥គ្រាប់ ដងគ្រាប់បេចំនួន១ ម្ជុលភ្លើងមីន៦៩ ចំនួន៥ដើម គ្រាប់កាំភ្លើងដៃចំនួន១០គីឡូ កាំភ្លើងស្វាយប្រវត្តិឆេះខូច ចំនួន៦ដើម សំបកមីនតោនចំនួន២ កេះឈើខ្សែឆេះផ្ទុះចំនួន១ កេះឈើដាក់គ្រាប់បែកចំនួន១ កេះដែកដាក់ខ្សែឆេះយឺតចំនួន១ កេសុវត្ថិភាព (ស្មាច់) ដាក់គីបចរន្តចំនួន១ កាំភ្លើងខ្លីK59 ល្អចំនួន១ដើម គ្រាប់កាំភ្លើងK59 ចំនួន៤២គ្រាប់ គីបចរន្តចំនួន ២៩០ដើម គីបធម្មតា ៣០០ដើម។ ក្រោយពេលប្រមូលយកបានគ្រឿងផ្ទុះទាំងអស់នោះបានអស់ហើយ នៅវេលាថ្ងៃដដែលនោះ កម្លាំងជំនាញផ្នែកព្រហ្មទណ្ឌ នាំខ្លួនបុគ្គលិកអង្គការចំនួន ៣នាក់រួមមានឈ្មោះ អាគីរ៉ា ភេទប្រុស តួរនាទីជាប្រធានអង្គការ ទី២ឈ្មោះ អឿន យ៉ុន តួរនាទី អនុប្រធានអង្គការ និងទី៣ឈ្មោះ ហ៊ាញ សុគន្ធា ភេទប្រុស តួរនាទីជាប្រធានប្រតិបត្តិ ទៅសួរនាំបន្តនៅស្នងការនគរបាលខេត្តសៀមរាបទាំងយប់។ ក្នុងនោះកម្លាំងនគរបាលក៏បានរកឃើញ ក្មេងៗនៅក្នុងអង្គការចំនួន ១៧នាក់ ស្រី៧នាក់ ហើយបានមន្ទីរសង្គមកិច្ចខេត្តយកទៅរក្សាទុកនៅកន្លែងមានសុវត្ថិភាព។ នៅចំពោះមុខកម្លាំងនគរបាលលោក អាគីរ៉ា បានរៀបរាប់ថា គ្រាប់កាំភ្លើង និងគ្រាប់បែកខាងលើនេះ ខ្លួនមិនដឹងថា ឈ្មោះ នេត រេន ត្រូវជាឪពុកមារបស់លោក (បច្ចុបប្បន្នស្លាប់បាត់បង់ជីវិតទៅហើយនោះ) យកមកទុកពីពេលណានោះទេ ទើបតែរយៈពេលបីខែមុន ខ្លួនបានទៅបើកមើលឃើញ តែមិនបានរាយការណ៍ប្រាប់សម្ថកិច្ចនោះទេ។ ដោយឡែកឈ្មោះ ហ៊ាញ សុគន្ធា និងឈ្មោះ អឿន យ៉ុន បានឆ្លើយប្រាប់សមត្ថកិច្ចថា ពួកគាត់មិនដឹងថាលោក អាគីរ៉ា យកគ្រាប់មិនទាន់ផ្ទុះ និងគ្រាប់បែកមកទុកនៅក្នុងបន្ទប់នោះ តាំងពីពេលណានោះទេ ព្រោះបន្ទប់លោក អាគីរ៉ា ជាអ្នកប្រើប្រាស់ផ្ទាល់ខ្លួន។ បន្ទាប់ពីកម្លាំងនគរបាលសួរនាំបច្ចុប្បន្នលោកអា គីរ៉ា លោកហ៊ាញ សុគន្ធា និងលោក អឿន យ៉ុន ត្រូវបានបញ្ជូនខ្លួនទៅកាន់តុលាការ ហើយត្រូវបានចៅ​ក្រម​ស៊ើប​សួរ​​​នៃ​សាលាដំបូង​ខេត្តសៀមរាប សម្រេច​ឃុំ​ខ្លួននៅ​ពន្ធ​នាគារ​ជា​បណ្ដោះ​អាសន្ន ​កាលពីល្ងាចថ្ងៃទី​៣០​​​ ខែ​​សីហា​៕