បើយោងតាមគណនីហ្វេសប៊ុកមួយដែលមានឈ្មោះថា University of Health Sciences បានបង្ហោះសារដែលជាស្នាដៃកូនខ្មែរ និស្សិតខ្មែរយើងបានផលិតទឹកលាងដៃ សម្លាប់មេរោគ តាមវិធីសាស្រ្តរបស់អង្គការសុខភាពពិភពលោក (WHO)។ នៅក្នុងគណនីហ្វេសប៊ុកខាងលើបានបង្ហោះសារថា "ស.វ.ស ផលិតទឹកលាងដៃសម្លាប់មេរោគ តាមវិធីសាស្រ្តរបស់អង្គការសុខភាពពិភពលោក (WHO)
និស្សិត សាស្រ្តាចារ្យ មន្រ្តីរាជការ បុគ្គលិកទាំងអស់នៅ សាកលវិទ្យាល័យវិទ្យាសាស្រ្តសុខាភិបាល"ស.វ.ស" អាចធ្វើការសម្អាប់មេរោគផ្សេងៗនៅជាប់នឹងដៃ តាមរយៈផលិតផលទឹកលាងដៃ (Solution hydro-alcoolique) ដែលមហាវិទ្យាល័យឱសថសាស្រ្ត នៃស.វ.ស បានផលិតដោយផ្ទាល់ដោយប្រើប្រាស់រូបមន្តអង្គការសុខភាពពិភពលោក។
ការរៀបចំនេះធ្វើឡើងភ្លាមៗតាមរយៈការណែនាំផ្ទាល់របស់ឯកឧត្តមសាស្រ្តាចារ្យ សាផុន វឌ្ឍនៈ សាកលវិទ្យាធិការនៃស.វ.ស សំដៅធ្វើយ៉ាងណាពង្រឹង និងបង្ការជាមុន នូវសុខមាលភាពទាក់ទងនឹងជម្ងឺឆ្លងផ្សេងៗតាមរយៈដៃមិនស្អាតនេះ។
ទឹកលាងដៃសម្លាប់មេរោគដែលផលិតនៅក្នុងមន្ទីពិសោធន៍របស់សាកលវិទ្យាល័យនេះ នឹងត្រូវដាក់ឱ្យប្រើប្រាស់នៅតាមទីតាំងសំខាន់ៗ ពិសេសច្រកចេញ-ចូល នៅបរិវេណទាំងពីរទីតាំងរបស់សាកលវិទ្យាល័យផ្ទាល់"។
ប្រភព៖ University of Health Sciences
