ឲ្យរៀង ! ចង់ឲ្យផេករបស់ខ្លួនល្បីពេក បង្កើតព័ត៏មានមិនពិត ធ្វើឲ្យសាធារណជនយល់ច្រឡំ ត្រូវបានសមត្ថកិច្ចកោះហៅ និងធ្វើកិច្ចសន្យា បញ្ឈប់សកម្មភាព

ឲ្យរៀង ! ដោយសារតែចង់ឲ្យផេករបស់ខ្លួនល្បីខ្លាំងពេក បង្កើតព័ត៏មានមិនពិត ធ្វើឲ្យសាធារណជនយល់ច្រឡំ ត្រូវបានសមត្ថកិច្ចកោះហៅ និងធ្វើកិច្ចសន្យា បញ្ឈប់សកម្មភាព

ភ្នំពេញ៖ កាលពីថ្ងៃទី១២ ខែសីហា ឆ្នាំ២០២០ ក្រុមការងារព័ត៏មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ សហការណ៍ជាមួយការិយាល័យប្រឆាំងបទល្មើសបច្ចេកវិទ្យា បានធ្វើការកោះហៅបុរសម្នាក់ ដែលបានផុសព័ត៏មានចាស់ យកមកឡាយធ្វើឲ្យប្រជាពលរដ្ឋមានការយល់ច្រឡំ ជាពិសេសបង្កឲ្យចលាចលក្នុងសង្គម។

បុរសដែលត្រូវបានសមត្ថកិច្ចធ្វើការកោះហៅរូបនោះ មានឈ្មោះថា សំ កុម្ភៈ ជាម្ចាស់គណនីហ្វេសប៊ុកផេក TCB អលចនទ្រព្យកម្ពុជា ។ បើតាមចំលើយសារភាពរបស់លោក សំ កុម្ភៈ បានឆ្លើយនៅចំពោះមុខសមត្ថកិច្ចថា រូបភាពដែលខ្លួនបានបង្ហោះនោះ គឺករណីភ្លើងឆេះផ្ទះប្រជាពលរដ្ឋដែលកើតឡើងតាំងពីខែមិថុនា ឆ្នាំ២០១៩ នៅសង្កាត់ទួលទំពូង ខណ្ឌចំការមន យកមកធ្វើការបង្ហោះឡាយជាវីដេអូ(Live Steam) កាលពីថ្ងៃទី១១ ខែសីហា ឆ្នាំ២០២០ វេលាម៉ោង ១៣និង៣០នាទី នៅរាជធានីភ្នំពេញ ក្នុងគោលបំណងចង់ឲ្យមានភាពទាក់ទាញខ្លាំងមកលើផេករបស់គាត់ ដែលធ្វើអោយសាធារណជនមានការភ័ណ្ឌច្រឡំ ជាពិសេសអាចបង្កឲ្យមានភាពចលាចលក្នុងសង្គមផងដែរ ។

បុរសម្នាក់នេះត្រូវបានក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សហការណ៍ជាមួយការិយាល័យប្រឆាំងបទល្មើសបច្ចេកវិទ្យានៃផែនការងារសន្តិសុខ កោះហៅឲ្យចូលខ្លួនមកធ្វើការបំភ្លឺ លើករណីនេះ បុរសម្នាក់នេះបានសារភាពកំហុស ធ្វើកិច្ចសន្យា និងថតជាវីដេអូសុំទោសជាសាធារណ:ចំពោះទង្វើដែលខ្លួនបានធ្វើដោយយកព័ត៌មានចាស់ករណីអគ្គិភ័យតាំងពីថ្ងៃទី១៣ ខែមិថុនា ឆ្នាំ២០១៩ មកឡាយដែលធ្វើឲ្យប្រជាពលរដ្ឋមានការយល់ច្រឡំ ។

លោកស្នងការដ្ឋាននគរបាលរាជធានីភ្នំពេញ សូមថ្លែងអំណរគុណចំពោះកិច្ចសហការណ៍ល្អរបស់សាធារណជន ជាពិសេសបណ្ដាញទំនាក់ទំនងសង្គមដែលបានចូលរួមចំណែករក្សាការពារសន្តិសុខ សុវត្ថិភាព សណ្តាប់ធ្នាប់សង្គម រិះគន់ក្នុងន័យស្ថាបនា និងទទួលយកជាមូលដ្ឋានធ្វើការកែលម្អ ហើយក៏សូមអំពាវនាវដល់សាធារណជន និងបណ្ដាញសង្គមចៀសវាងការអត្ថាធិប្បាយ ចងក្រងខ្លឹមសារ រូបភាពសកម្មភាពបំផ្លើសការពិត ជាហេតុបង្កឲ្យមានភាពវឹកវរ បំពុលបរិយាកាសសង្គម ចលាចល បង្កភាពភ័យខ្លាចដល់ប្រជាពលរដ្ឋ និងអាចប្រឈមចំពោះមុខច្បាប់ជាធរមានផងដែរ ៕