ប្រភេទត្រីកម្រ និងជិតផុតពូជ ត្រីត្រស់មួយក្បាលទម្ងន់ ៩គីឡូក្រាម និងស្រីខ្យា ត្រូវបានដកហូត ព្រោះតែ...(មានវីដេអូ)

ខេត្តស្ទឹងត្រែង ៖ កាលពីរសៀលថ្ងៃទី ២០ ខែសីហាឆ្នាំ ២០២០ ត្រង់ចំណុចអូរអញ្ជាង ស្ថិតក្នុងភូមិខ្សាច់ថ្មី ឃុំតាឡាត ស្រុកសេសាន ខេត្តស្ទឹងត្រែង សមត្ថកិច្ចការិយាល័យប្រឆាំងបទល្មើសសេដ្ឋកិច្ច នៃស្នងការនគរបាល ខេត្តស្ទឹងត្រែង ចុះពិនិត្យទីតាំងនេសាទ ខុសច្បាប់ ចំនួន ៩កន្លែង និងដកហូតត្រីត្រសក់ មួយក្បាលមានទម្ងន់រហូតដល់ទម្ងន់៩ គីឡូក្រាម និងត្រីខ្យា មួយក្បាល។

ត្រីត្រសក់ គឺជាប្រភេទត្រីធំ ក្នុងចំណោមប្រភេទត្រីធំៗដទៃទៀត ដែលរស់នៅក្នុងទន្លេមេគង្គ។ ត្រីប្រភេទនេះ វាអាចធំលួតលាស់រហូតដល់ទម្ងន់ជាង៩០គីឡូក្រាម (២០០ ផោន) និងមានប្រហែលដងខ្លួន ១,៥ ម៉ែត្រ (៥ហ្វីត) ។ ចំនែកឯស្រីខ្យាវិញ មានឈ្មោះវិទ្យាសាស្ត្រ (Hemibagrus wyckioides) និងឈ្មោះជាភាសាអង់គ្លេស Asian Red Tailed Catfish, Red fin bagrus មានប្រវែងដងខ្លួនអតិបរមា ១៣០ស.ម និងទម្ងន់អតិបរិមា ៨៦គីឡូក្រាម។

ត្រីខ្យារស់នៅតាមទន្លេតាមដងទន្លេ អូរធំៗ ក្នុងតំបន់ខ្ពង់រាបដែលមានទឹកជ្រៅ និងផ្ទាំងថ្មធំៗ។ នៅក្នុងប្រទេសកម្ពុជា ត្រីខ្យាមានរស់នៅច្រើនក្នុងទន្លេ (ស៣) គឺសេកុង សេសាន និងស្រែពក។ ត្រីខ្យា ត្រូវបានគេកត់ត្រាចូលក្នុងបញ្ជីក្រហម IUCN Red List (Least Concern) ក្នុងឆ្នាំ ២០១២ ជាប្រភេទត្រីដែលរងគ្រោះតិចតួច ដែលនឹងអាចឈានទៅការផុតពូជ។

នាយការិយាល័យប្រឆាំងបទល្មើសសេដ្ឋកិច្ច បានឲ្យដឹងថា នៅរដូវនេះ គឺជារដូវបិទនេសាទ តែសកម្មភាពនេសាទខុសច្បាប់ នៅតែកើតមានតាមទីដាច់ស្រយាលមួយចំនួន ជាហេតុធ្វើឲ្យបាត់បង់នូវពូជត្រីសំខាន់ៗ ។ លោកបានបន្តទៀតថា ការចុះរុករកទីតាំងនេសាទខុសច្បាប់ ខាងលើនេះ សមត្ថកិច្ចបានរកឃើញទីតាំង ដាក់ឆ្នុកខុសច្បាប់ ក្នុងអូចំនួន៩កន្លែង នៅក្នុងអន្លង់អភិរក្សរបស់សហគមន៍ សាមគ្គីរុងរឿង និងបានដកហូតឧបករណ៍នេសាទខុសច្បាប់ មួយចំនួន និងប្រភេទ ត្រីកម្រ ចំនួនពីរក្បាល គឺត្រីខ្យាមួយក្បាល និងត្រីត្រសក់ មួយក្បាល៕

ទស្សនាវីដេអូខាងក្រោម៖