លោកស្រី ទ្រី ដាណា ជាបុគ្គលម្នាក់ ដែលមានចិត្តល្អ ក្តីមេត្តា បានជួយដល់ជនទីទាល់ក្រយ៉ាងច្រើន ពិសេសគឺបានជួយដល់លោកយាយលោកតា​ ចាស់ជរា បងប្អូនពូមីង ដែលកំពុងតែជួបនូវការខ្វះខាតថវិកា ដើម្បីមើលជំងឺ ព្រមទាំងបានជួយសាងសងផ្ទះ និងទីកន្លែងជាច្រើនទៀតផងដែរ។

ជាក់ស្តែងកាលពីថ្ងៃម្សិលមិញនេះ លោកស្រី ទ្រី ដាណា​ និងស្វាមី បានអញ្ជើញទៅកាត់ខ្សែបូ ឡើងគេហដ្ឋានថ្មី​របស់លោក ដែលលោកស្រី បានចំណាយថវិកានៅក្នុងការសាងសង់ជូនពួកគាត់សម្រាក និងផ្តល់ចំណេះដឹងដល់ក្មេងៗជំនាន់ក្រោយ ឲ្យបានរៀនសូត្រ។

លោកស្រី ទ្រី ដាណា បានបង្ហោះសារថា "ថ្ងៃនេះ នាងខ្ញុំ និងស្វាមី បានមកសម្ពោធផ្ទះគ្រូមួយខ្នង នៅខាងភ្នំពីរ ខេត្តក្រចេះ មានផ្ទះ ទើបគ្រូៗអាចនៅបង្រៀនបាន ព្រោះនៅដាច់ស្រយាលពេក ឃើញហើយអាណិត ទើបនាងខ្ញុំជួយឧបត្ថម្ភការសាងសង់នេះ។ នៅទីនេះ ភាគច្រើន ជាបងប្អូនជនជាតិដើមភាគតិច ប្លែកភ្នែកណាស់។ សង្ឃឹមថា ការជួយបន្តិចបន្តួចនេះ អាចចូលរួមចំណែក ក្នុងវិស័យអប់រំនៅកម្ពុជា។ នាងខ្ញុំ ក៏បានជូនថវិកា សិស្សម្នាក់ ៥ម៉ឺនរៀល ទុកទិញសម្ភារៈសិក្សាផងដែរ ខំរៀនណា ក្មួយៗ"។