ភ្នំពេញ៖ ចោរលួចចិត្តធំ ហានលួចម៉ូតូរបស់លោកអធិការរង ខណៈជិះម៉ូតូដើរល្បាតក្នុងមូលដ្ឋានបានសម្រេច តែត្រូវនគរបាលប៉ុស្តិ៍ដេញតាមឃាត់បានតែម៉ូតូជនសង្ស័យចំនួន១គ្រឿង ចំណែកក្រុមជនសង្ស័យបានរត់គេចខ្លួនបាត់ស្រមោល ដែលហេតុការណ៍នេះបានកើតឡើង កាលម៉ោងជិត៥ទៀប ភ្លឺថ្ងៃទី១៧ ខែមេសា ឆ្នាំ២០១៨ នៅចំណុចផ្លូវលេខ១៩៩ ស្ថិតនៅក្នុងសង្កាត់ទួលស្វាយព្រៃទី២ ខណ្ឌចំការមន។

សមត្ថកិច្ចបានឲ្យដឹងថា ម៉ូតូជនសង្ស័យដែលផ្តួលចោលម៉ាកហុងដាឌ្រីមសង់សេ១២៥ពណ៍មាស ពាក់ស្លាកលេខភ្នំពេញ 1GJ-0828 សេរីឆ្នាំ២០១៧ ។ ចំណែកជនរងគ្រោះមានឈ្មោះ កុយ ខាន់ណារិទ្ធ ជាអធិការរងទទួលបន្ទុកសេនាធិការ នៅអធិការដ្ឋាននគរបាលខណ្ឌចំការមន។ លោកអធិការរងបានប្រាប់ថា មុនពេលកើតហេតុលោកអធិការរងបានជិះម៉ូតូម៉ាកហុងដាឌ្រីមសង់សេ១២៥ពណ៍ខ្មៅសេរីឆ្នាំ២០១៣ ដើម្បីល្បាតក្នុងមូលដ្ឋាននិងមានដឹកលោកមេភូមិពីក្រោយគោលបំណងចប់ម៉ោងរកកន្លែងផឹកកាហ្វជជែកគ្នាលេង ខណៈមកដល់ចំណុចកើតហេតុស្រាប់តែមានជនសង្ស័យ៤នាក់ជិះម៉ូតូម៉ាកហុងដាឌ្រីមសេ១២៥ចំនួន២គ្រឿង បានធ្វើសកម្មភាពឆក់ទូរស័ព្ទម៉ាកសាំសុងពីហោប៉ាវអាវគាត់រួចបើម៉ូតូគេចខ្លួន ភ្លាមនោះលោកអធិការរងបានបើកម៉ូតូដេញតាម និងស្រែកតាមវិទ្យុទាក់ទងតែត្រូវបក្សពួកជនសង្ស័យ២នាក់ជិះម៉ូតូមកពីខាងក្រោយហើយធាក់ម៉ូតូគាត់កុំអោយដេញតាមបក្សពួកជនសង្ស័យហើយក្រោយមកម៉ូតូគាត់ក៏ដួលតែម្ដងទៅ ។ បច្ចុប្បន្នសមត្ថកិច្ចបាននឹងកំពុងតែ ធ្វើការស្រាវជ្រាវវែកមុខជនដៃដល់ មកផ្តន្ទាទោសតាមច្បាប់៕ ដោយ៖ អាឆើត