ឧត្តរមានជ័យ៖ កាលពីថ្ងៃទី០១ ខែសីហា ឆ្នាំ២០១៨ រថយន្តដឹកជញ្ជូន និងចែកចាយស្រាបៀរកម្ពុជានៅខេត្តឧត្ដរមានជ័យ បែកកង់ក្រោយខាងឆ្វេង​ ខ្ចាយស្រាបៀរ​ពាសពេញផ្លូវ​ ខណៈដែលដឹកស្រាបៀរចេញពីស្រុកអន្លង់វែង ទៅចែកចាយនៅតាមដេប៉ូនៅក្នុងខេត្ដ ស្ថិតនៅចំណុចគីឡូម៉ែតលេខ៨៧ នៅលើកំណាត់ផ្លូវជាតិលេខ៦៨ ក្នុងភូមិស្លែង សង្កាត់កូនគ្រាល​ក្រុងសំរោងខេត្តឧត្ដរមានជ័យ ។

អ្នកបើកបរឈ្មោះ ពើត ពាន់​ ភេទប្រុសអាយុ ១៩ឆ្នាំ រស់នៅភូមិទួល​គ្រួស ឃុំអន្លង់វែង ស្រុកអន្លង់វែងបើកបររថយន្ដដឹកស្រាបៀរ​កម្ពុជាម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D-0103 ដោយរួមដំណើរមានគ្នាចំនួន៣នាក់ តែមិនគ្រោះថ្នាក់ដល់អាយុជីវិតឬរងរបួសទេ ។ សមត្ថកិច្ចបានឲ្យដឹងថា រថយន្តដឹកជញ្ជូន និងចែកចាយស្រាបៀរកម្ពុជា បែកកង់ក្រោយខាងឆ្វេង​ ទើបបណ្ដាលឲ្យរថយន្ដដែលកំពុងតែផ្ទុកស្រាបៀរធ្ងន់ផងនោះទប់លំនឹងមិនបាន​ក៏ក្រឡាប់ផ្ងារជើងកណ្ដាលផ្លូវតែម្ដង ដោយមិនមានកង្កឲ្យមានគ្រោះថ្នាក់ដល់អ្នកដទៃ​ ធ្វើដំណើរនៅតាមដងផ្លូវ ឬអ្នកនៅក្នុងរថយន្ដនោះឡើយ ។ ក្រោយសមត្ថកិច្ចចុះមកត្រួតពិនិត្យរួច ក៏បានប្រគល់ឲ្យម្ចាស់រថយន្តវិញ ដើម្បីយកទៅជួសជុល ៕ ដោយៈ និស្ស