កំពង់ចាម៖ នៅវេលាម៉ោង៧ព្រឹក ថ្ងៃទី១០ ខែសីហា ឆ្នាំ២០១៨នេះ ទឹកទន្លេមេគង្គខេត្តកំពង់ចាម បានបន្តការកើនឡើងលើសពីកំម្រិត។ បើយោងតាមការព្យាករណ៍របស់ក្រសួងធនធានទឹកនិងឧតុនិយម គឺ ទឹកទន្លេមេគង្គនៅខេត្តកំពង់ចាមនឹងឡើងដល់កម្ពស់ ១៥,២៨ម៉ែត្រខ្ពស់ជាងកម្រិតប្រកាសឲ្យប្រុងប្រយ័ត្ន១៦, ២០ម៉ែត្រក្នុងរយៈពេល ៣ ឬ ៤ ថ្ងៃខាងមុខ។ ដោយសារស្ថានភាពទឹកជំនន់ចេះតែមានការកើនឡើង បានធ្វើឲ្យមនុស្សចំនួន៨មកហើយ ដែលបានស្លាប់បាត់បង់ជីវិតដោយសារតែលង់ទឹក ជនរងគ្រោះដែលបានស្លាប់បាត់បង់ជីវិតនោះរស់នៅក្នុងស្រុកកំពង់សៀម ស្ទឹងត្រង់ បាធាយ ព្រៃឈរ កងមាស និងក្រុងកំពង់ចាម។

គួរបញ្ជាក់ផងដែរថា មនុស្សជិតពីរពាន់នាក់ និងសត្វពាហនៈ ត្រូវបានជម្លៀសទៅកាន់ទីទួលសុវត្ថិភាព ខណៈដែលទឹកជំនន់ កំពុងយាយីស្រុកចំនួន៩ ក្នុងចំណោមស្រុកក្រុងចំនួន១០របស់ខេត្ត ធ្វើឲ្យប៉ះពាល់ពលរដ្ឋជាង២ម៉ឺន២ ពាន់គ្រួសារ ដំណាំកសិកម្ម ជាង៥ពាន់ហិកតា វត្តអារាម សាលារៀន មណ្ឌលសុខភាព ផ្លូវ ស្ពាន និងបង្ក ការបាក់ច្រាំងទន្លេផងដែរ។ លោក គួច ចំរើន អភិបាលខេត្តកំពង់ចាមរួមជាមួយក្រុមការងារ​នៅ​ព្រឹកថ្ងៃទី១០ខែសីហាឆ្នាំ២០១៨នេះ បាននាំយកអំណោយ​សង្គ្រោះ​បន្ទាន់ចាំបាច់ដូចជាអង្ករ មីដឹកតាមទូកឈើតូចៗទៅចែកដល់គ្រួសារ ដែលរងគ្រោះដោយសារទឹកជំនន់ចំនួន៨៩គ្រួសារ នៅភូមិរដ្ឋមុនី ឃុំ​មហាលាភ ស្រុកកោះសូទិន ខេត្តកំពង់ចាមដែលពុំបានចេញទៅ​ណារួចពីផ្ទះច្រើនថ្ងៃមកហើយ។ សូមបងប្អូនប្រជាពលរដ្ឋមានការប្រុងប្រយ័ត្ន អំឡុងពេលនេះ ស្ថានភាពទឹកជំនន់នៅកម្ពុជាហក់ឡើងខ្ពស់ ក្រសួងធនធានទឹក និងឧតុនិយម បាន ស្នើរសូមក្រសួងស្ថាប័នពាក់ព័ន្ធ អាជ្ញាធរដែនដី និង ប្រជាពលរដ្ឋ ត្រូវបង្កើនការប្រុងប្រយ័ត្នដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ៕ ដោយ៖ សិស្ស