ស្រវឹងធ្លាក់ភ្នែកបើករថយន្តបុករ៉ឺម៉កម៉ូតូក្រឡាប់ផ្ងាជើងចាក់ផ្លែឈើពេញផ្លូវ និងបង្កឲ្យម្ចាស់រុឺម៉ករងរបួសធ្ងន់
-

ភ្នំពេញ៖​ បុរសម្នាក់បានរងរបួសធ្ងន់ត្រូវរថយន្តសង្គ្រោះដឹកទៅមន្ទីរពេទ្យភ្លាមៗ​ ខណះកំពុងបើករ៉ឺម៉កម៉ូតូហើយត្រូវរថយន្តបើកបុកពីក្រោយពេញទំហឹងក្រឡាប់ផ្ងារជើងចាក់ផ្លែឈើពេញផ្លូវ ។

ហេតុការណ៍​នេះបានកើតឡើងកាលពីវេលាម៉ោង២រំលងអាធ្រាតឈានចូលថ្ងៃទី២៤​ ខែសីហា​ឆ្នាំ២០១៨​ នៅចំណុចមុខវត្តស្ទឹងមានជ័យ​ តាមបណ្តោយផ្លូវមុន្នីរ៉េត​ ស្ថិតក្នុងសង្កាត់ស្ទឹងមានជ័យទី១​ ខណ្ឌមានជ័យ។
តាមសាក្សីនៅកន្លែងកើតហេតុបានអោយដឹងថា​ មុនពេលកើតហេតុបុរសម្នាក់បើករ៉ឺម៉កកង់បីធ្វើដំណើរតាមបណ្តោយផ្លូវមុន្នីរ៉េតក្នុងទិសដៅពីកើតទៅលិចខណះមកដល់ចំណុចកើតហេតុស្រាប់តែមានរថយន្តមួយគ្រឿងម៉ាកកាមរីបាឡែន​ ពណ៍ទឹកប្រាក់ពាក់ស្លាកលេខភ្នំពេញ2Y-8597​ បើកបរដោយបុរសម្នាក់ស្រវឹងជោគជាំ​ធ្វើដំណើរមកពីក្រោយក្នុងល្បឿនលឿនក៏ជ្រុលបុករ៉ឺម៉កកង់បីពីក្រោយពេញទំហឹងបណ្តាលអោយកង់បីក្រឡាប់ផ្ងាជើងចំណែកម្ចាស់រងបួសធ្ងន់។ ភ្លាមនោះជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ។
ក្រោយមក សមត្ថកិច្ចបានទំនាក់ទំនងទៅជំនាញចរាចរណ៍ ឲ្យមកធ្វើការវាស់វែង យករថយន្តបង្កនិងម៉ូតូរុឺម៉ករងគ្រោះ ទៅកាន់ការិយាល័យចរាចរណ៍គោក នៃស្នងការដ្ឋានននគរបាលរាជធានីភ្នំពេញ រងចាំដោះស្រាយតាមនីតិវិធីច្បាប់ ៕
ដោយ៖ ភារ៉ា