ភ្នំពេញ៖ ដោយសារតែស្ថានភាពផ្លូវកំពុងជួសជុលម្ខាងក៏មានការបើកឲ្យធ្វើចរាចរណ៍រួមគ្នាតែផ្លូវម្ខាងហេតុនេះហើយទើបរថយន្ដកុងតៃន័រ២គ្រឿងបានបុកគ្នាពេញទំហឹងបណ្ដាលឲ្យរងការខូចខាតទាំងសងខាងយ៉ាងដំណំ តែសំណាងល្អមិនបណ្ដាលឲ្យមានអ្នកណាម្នាក់រងរបួសទេ ។ ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង ៤ និង ១០ នាទីរសៀលថ្ងៃទី២៤ ខែសីហាបឆ្នាំ២០១៨ នៅចំណុចផ្លូវ៥០ម៉ែត្រ ភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនពេលកើតហេតុគេបានឃើញរថយន្ដកុងតៃន័រមួយគ្រឿងដែលមានក្បាលពណ៌ស ពាក់ស្លាក់លេខ ភ្នំពេញ 3B-7252 បានធ្វើដំណើរក្នុងទិសដៅពីលិចមកកើតក្នុងស្ថានភាពផ្លូវម្ខាងដោយសារតែផ្លូវម្ខាងទៀតត្រូវបិទជួសជុល ស្រាប់តែមកដល់ពាក់កណ្ដាលកន្លែងបិទផ្លូវក៏មានរថយន្ដកុងតៃន័រមួយគ្រឿងទៀតដែលមានក្បាលពណ៌ត្រេអ៊ី ពាក់ស្លាកលេខ ភ្នំពេញ 3A-3284 បានធ្វើដំណើរក្នុងទិសដៅពីកើតមកលិចបណ្ដាលឲ្យបុករថយន្ដកុងតៃន័រដែលកំពុងបើកបញ្ច្រាស់ទិសគ្នាពេញទំហឹងតែម្ដង ប៉ុន្ដែសំណាងល្អដែរនៅក្នុងគ្រោះថ្នាក់ចរាចរណ៍ខាងលើនេះមិនបណ្ដាលឲ្យមានអ្នកណារម្នាក់រងរបួសឡើយ ។ ក្រោយពេលកើតហេតុសមត្ថកិច្ចមូលដ្ឋានបានចុះទៅដល់កន្លែងកើតហេតុរួចក៏បានទាក់ទងទៅសមត្ថកិច្ចជំនាញចរាចរណ៍ជើងគោកនៃអធិការដ្ឋាននគរបាលខណ្ឌដង្កោចុះមកវាស់វែង ប៉ុន្ដែពេលសមត្ថកិច្ចចុះមកដល់កន្លែងកើតហេតុភាគីរថយន្ដកុងតៃន័រក្បាលពណ៌ត្រេអ៊ីចេញថ្លៃខូចខាតទៅភាគីរថយន្ដកុងតៃន័រក្បាលពណ៌ស យកទៅជួសជុលបញ្ចប់រឿងនៅកន្លែងកើតហេតុតែម្ដង ៕ ដោយ៖ ភ័ក្ត្រា