ភ្នំពេញ ៖ ទណ្ឌិត​ជន​ល្បី​ម្នាក់​ឈ្មោះ ហង្ស វុទ្ធី ហៅ​យមរាជ ដែលបានជាប់ចោទពីបទក្ដី​ឃាតកម្ម​ជាច្រើន នៅក្នុងសម័យកាលលោក ហេង ពៅ ធ្វើជាស្នងការនគរបាល​រាជធានី​ភ្នំពេញ បាន​ស្លាប់​ហើយដោយ​រោគាពាធ​នៅឯ​មន្ទីរពេទ្យ​ពន្ធនាគារ​កាលពី​ថ្ងៃទី ១០​កញ្ញា ឆ្នាំ​២០១៨​កន្លងទៅ។

ជាក់ស្តែងនៅក្នុងគណនីហ្វេសប៊ុកមួយដែលមានឈ្មោះ HENG NICH បានរៀបរាប់យ៉ាងកំសត់ថា "នាងខ្ញុំឈ្មេាះ សុន សុភណ្ឌ័ ដែលត្រូវជា ប្អូនរបស់ ហង្ស វុទ្ធី និង ហង្ស វុត្ថា នៅពេលនេះ ហង្ស វុទ្ធី បានទទួលមរណភាពនាថ្ងៃទី ១០ ខែ កញ្ញា ឆ្នាំ ២០១៨ វេលាម៉េាង ១០ .៣០ នាទីព្រឹក នៅពេទ្យរុស្សី នាងខ្ញុំត្រូវជាប្អូនសុំសម្តេចតេជា ហ៊ុន សែន មេត្តាជួយអន្តាគមន៍ទៅតុលាការសូមជួយដេាះលែងបងប្រុសហង្ស វុត្ថា ដែលនៅក្នុងពន្ធាគារអេាយគាត់បានមកចូលរួមពិធីបុណ្យសពបង ហង្ស វុទ្ធី មានតែសម្តេចទេដែលអាចជួយដល់បងប្រុសហង្ស វុត្ថាអេាយមានសេរីដែលជាប់ឃុំរយះពេលដប់បីឆ្នាំហេីយ សូមព្រះប្រទានពរសម្តេច"។ ម្ចាស់គណនីហ្វេសប៊ុកខាងលើក៏បានរៀបរាប់ទៀតថា "បងប្រុសទី២នាងខ្ញុំ ឈ្មោះ ហង្ស វុទ្ធី ហៅ យមរាជបានស្លាប់ហើយ នៅមន្ទីរពេទ្យ រុស្សី វេលាម៉ោង ១០.៣០នាទី ថ្ងៃទី ១០ ខែកញ្ញា ឆ្នាំ២០១៨។ នាងខ្ញុំឈ្មោះ សុខ សុភ័ណ្ឌ ត្រូវជាប្អូនស្រីគាត់ សុំអំពាវនាវដល់សម្ដេច តេជោ ហ៊ុនសែន មេត្តាដោះលែងបងប្រុសទី៣នាងខ្ញុំឈ្មោះ ហង្សវត្ថា ដើម្បីអោយបងប្រុសនាងខ្ញុំមកធ្វើបុណ្យសព និង ជួបបងប្រុស ហង្ស វទ្ធី ជាចុងក្រោយ។ សុំឲសម្តេច តេជោ ហ៊ុន សែន មេត្តាអនុគ្រោះដោះលែងបងប្រុសនាងខ្ញុំផង"។ សូមបញ្ជាក់ថា​ នៅក្នុង​ការតស៊ូ​តាមផ្លូវ​ច្បាប់​នៅ​តុលាការ​នា​នាទីចុងក្រោយ តុលាការ​គ្រប់​ជាន់ថ្នាក់​នៅតែ​តម្កល់​ទោស​អោយ​ហង្ស វុទ្ធី ហៅ​យមរាជ​មាន​ពិរុទ្ធ​នៅក្នុង​រឿងក្ដី​ឃាតកម្ម​ជាច្រើន ។ លោកហង្ស វុទ្ធី ធ្លាប់បានហែកគុករត់ចេញទៅលាក់ខ្លួនជា ច្រើនកន្លែងកាលពីថ្ងៃទី១១ ខែមិថុនា ឆ្នាំ២០០៦ ហើយបានចូលខ្លួនសារភាពនៅស្នាក់ការអង្គការក្រៅរដ្ឋាភិបាលមួយកាលពីថ្ងៃទី២០ ខែមេសា ឆ្នាំ២០១២។ លោក ហង្ស វុទ្ធីត្រូវបានតុលាការកាត់ទោសនិងផ្តន្ទាទោសកំបាំងមុខកាលពីឆ្នាំ២០០៩ ឲ្យជាប់ពន្ធនាគាររយៈពេល១៥ឆ្នាំ ក៏ប៉ុន្តែលោក បានស្នើឲ្យតុលាការបើកសវនាការសារជាថ្មី បន្ទាប់ពីលោកគាត់បានចូលសារភាព។ បន្ទាប់ពីបើកសវនាការសារជាថ្មី លោក ហង្ស វុទ្ធី ត្រូវបានលោកតុប ឈុនហេង ចៅក្រម សាលាដំបូងរាជធានីភ្នំពេញ សម្រេចតម្កល់ទោសឲ្យជាប់ ពន្ធនាគារ១៥ឆ្នាំដដែល ពីបទប៉ុនប៉ងឃាតកម្មគិតទុកជាមុនលើលោកនាយឧត្តមសេនីយ៍សៅ សុខា មេបញ្ជាការកងរាជអាវុធហត្ថលើផ្ទៃប្រទេសកាលពីឆ្នាំ២០០៣៕ ដោយ៖ ភារ៉ា