ខេត្តតាកែវ៖ ថ្មីៗនេះ មហាជនច្បាស់ជាបានដឹងហើយអំពីព័ត៌មានបង្ហាញពីសារសំឡេងរបស់ព្រះសង្ឃព្រះនាម ឡុង ចន្ថា ដែលល្បីល្បាញខាងសម្ដែងធម៌ទេសនា វោហារកំប្លុកកំប្លែង បង្កប់អត្ថន័យអប់រំ បានផ្ញើសារសំឡេងញ៉ែញ៉ង ឆ្លងឆ្លើយ ទៅកាន់មនុស្សស្រីវ័យក្មេងម្នាក់ ដែលសកម្មភាពនេះ ក៏បានបង្កឲ្យមានការរិះគន់យ៉ាងខ្លាំងពីសំណាក់មហាជនមួយចំនួនធំ យ៉ាងចាស់ដៃផងដែរ។
បន្ទាប់ពីទទួលរងការរិះគន់យ៉ាងចាស់ដៃរួចស្រាប់តែ ព្រះសង្ឃព្រះនាម ឡុង ចន្ថា បានសម្រេចចិត្តថា នឹងលាចាកសិក្ខាបទ ដោយខ្លួនឯងនៅថ្ងៃទី១៤ ខែឧសភា ឆ្នាំ ២០២០ ក្រោយមានការបែកធ្លាយ វីដេអូឆាតញ៉ែស្រីតាមហ្វេសប៊ុក ប៉ុន្តែស្រាប់តែមុននេះ បន្តិច សង្ឃឡុង ចន្ថា បានប្តូរចិត្តមិនសឹកវិញ ក្រោមហេតុផលមិនទាន់អស់និស្ស័យនឹងព្រះផ្នួស។
ជាមួយគ្នានេះដែរលោក ជួង វ៉ាន ប្រធានមន្ទីរធម្មការនិងសាសនាខេត្តតាកែវ បានឲ្យដឹងនៅរសៀលថ្ងៃទី១៤ ខែឧសភា ឆ្នាំ២០២០នេះថា អាជ្ញាធរមានសមត្ថកិច្ច ដែលដឹកនាំដោយលោកផ្ទាល់ នឹងចុះទៅវត្តភ្នំបូរី ដើម្បីធ្វើកំណត់ហេតុ និង ឃាត់ខ្លួនព្រះតេជគុណ ឡុង ចន្ថា ប្រសិនបើមិនធ្វើតាមការសន្យាលាចាកសិក្ខាបទ ដោយគិតត្រឹមម៉ោង១៧និង ៣០ នាទីល្ងាចនេះ៕
