ភ្នំពេញ៖ ជនសង្ស័យម្នាក់បានធ្វើសកម្មភាព លួចកាច់. កម៉ូតូ ហើយរត់គេចបានរយៈពេលជិត១ខែ ក៏ត្រូវបានកម្លាំងសមត្ថកិច្ចប៉ុស្តិ៍នគរបាលស្ទឹងមានជ័យ៣ធ្វើការស្រាវជ្រាវឃាត់ខ្លួន បានមកវិញ ។ ការឃាត់ខ្លួននេះបានធ្វើឡេីងនៅ វេលាម៉ោង ៥និង៣០នាទីទាបភ្លឺ ថ្ងៃទី១៧ ខែឧសភា ឆ្នាំ២០២០ នៅបណ្ដោយ ផ្លូវដួងងៀប ភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។
ជនសង្ស័យមានឈ្មោះញឹម ជាតិ ភេទប្រុស អាយុ២៨ឆ្នាំ មុខរបរ មិនពិតប្រាកដ ស្នាក់នៅមិនពិតប្រាកដ។ តាមសម្តី លោកវរសេនីយ៍ត្រី ឯម ភារី នាយប៉ុស្តិ៍នគរបាលស្ទឹងមានជ័យ៣ បានឲ្យដឹងថា មុននឹងឈានដល់ការឃាត់ខ្លួនជនសង្ស័យខាងលើ គឺនៅថ្ងៃទី ១១ ខែមេសា ឆ្នាំ២០២០ គឺមានជនរងគ្រោះម្នាក់ បានមកដាក់ពាក្យបណ្ដឹង ថាមានជនសង្ស័យមួយក្រុម បានធ្វើសកម្មភាព កាច់ កម៉ូតូ ម៉ាក ZOMER X ទៅបាត់ហើយ បន្ទាប់ពីទទួលបានពាក្យបណ្ដឹងរបស់ជនរងគ្រោះហើយ កម្លាំងសមត្ថកិច្ចប៉ុស្តិ៍នគរបាលស្ទឹងមានជ័យ៣ បានធ្វើការស្រាវជ្រាវ និងឆែកមើលកាម៉ារ៉ាសុវត្ថិភាពរហូតមកដល់ យប់ថ្ងៃទី១៧ ខែឧសភា ឆ្នាំ២០២០ កម្លាំងសមត្ថកិច្ចប៉ុស្តិ៍បានល្បាតក្នុងមូលដ្ឋាន ក៍ប្រទះឃើញ បុរសជាជនសង្ស័យ ដែលភិនភាគដូចក្នុងរូបកាម៉ារ៉ាសុវត្ថិភាពដែលកំពុងដើរតាមបណ្ដោយផ្លូវដួងងៀប ទេីបសមត្ថកិច្ចបានធ្វើការឃាត់ខ្លួនយកមកធ្វើការសាកសួរនៅប៉ុស្តិ៍នគរបាលស្ទឹងមានជ័យ៣។
នៅពេលដែល សមត្ថកិច្ចធ្វើការសាកសួរ ជនសង្ស័យ បានសារភាពថា រូបគេពិតជាបានធ្វើសកម្មភាព កាច់.កម៉ូតូ របស់ជនរងគ្រោះ កាលពីថ្ងៃទី ១១ ខែមេសា ឆ្នាំ២០២០ ពិតប្រាកដមែន។ បន្ទាប់ពីសាកសួររួច ជនសង្ស័យត្រូវបានសមត្ថកិច្ច កសាងសុំណុំរឿងបញ្ជូនខ្លួនទៅ អធិការនគរបាលខណ្ឌមានជ័យ ដេីម្បីចាត់ការបន្តតាមនិតិវិធីជាបន្តទៀត ៕
ដោយ៖ ភត្ត្រា
