ភ្នំពេញ៖ នៅព្រឹកថ្ងៃទី ៦ ខែកក្កដា នេះ មន្ត្រីជំនាញសុរិយោដីរួមទាំងចៅសង្កាត់គោងឃ្លាង បានចុះធ្វើការត្រួតពិនិត្យនិងវាស់វែងដោយបាញ់ GPS នៅចំណុចដែលមានបញ្ហាត្រង់ព្រំប្រទល់ដី សំណង់ផ្ទះរបស់លោក ព្រាប សុវត្ថិ ហើយបានរកឃើញថា កំពូលតារាចម្រៀងប្រចាំប្រទេសរូបនេះ ពិតជាបានសាងសង់ផ្ទះបំពានលើចិញ្ចើមផ្លូវ ប្រាកដមែន ។

ដូច្នេះហើយយើងឃើញថាការលើកឡើងរបស់ប្រជាពលរដ្ឋកន្លងមកពីបញ្ហាការសាងសង់បំពានលើចិញ្ចើមផ្លូវធ្វើឲ្យផ្លូវរួមតូចរបស់តារាចម្រៀងល្បី លោក ព្រាបសុវត្ថិ គឺជាការពិតមែនមិនមែនដូចដែលលោកព្រាបសុវត្ថិលើកឡើងថាប្រជាពលរដ្ឋមូលដ្ថានបង្កាច់ធ្វើឲ្យអាប់អោនកិត្តិយសរបស់លោកនោះទេ។

គួររំលឹកផងដែរថាទីលំនៅរបស់តារាចម្រៀង លោកព្រាបសុវត្ថិដែលមានទីតាំងស្ថិតនៅ​ ភូមិច្រេស សង្កាត់គោងឃ្លាង ខណ្ឌសែនសុខ​ បានសាងសង់បំពានលើចិញ្ចើមផ្លូវ​ ធ្វេីអោយផ្លូវរួមតូច ហើយរោងអារឈើ​ បិទផ្លូវ​ នៅខាងក្រោយផ្ទះរបស់លោក​ ធ្វើឱ្យមានការប៉ះពាល់ដល់ការធ្វើដំណើររបស់បងប្អូនប្រជាពលរដ្ឋនៅក្នុងទីតាំងនោះជាច្រើនគ្រួសារ។

មហាជនចាប់អារម្មណ៍ជាខ្លាំង បន្ទាប់ពីមានព័ត៌មានថា កំពូលតារាចម្រៀងប្រុសប្រចាំប្រទេសកម្ពុជា ដែលកន្លងមកមិនធ្លាប់មានរឿងអាស្រូវទាល់តែសោះ ត្រូវបានប្រជាពលរដ្ឋរហូតដល់ទៅ ៧០គ្រួសារ មកតវ៉ានៅមុខផ្ទះលោក ដោយអះអាងថា លោកបានបំពានផ្លូវសាធារណៈ និងធ្វើឲ្យរំខានអ្នកជិតខាង។

គួរជម្រាបថា បើតាមការតវ៉ា​នោះ អ្នកជិតខាងលោក ព្រាប សុវត្ថិ បាន​ស្នើសុំ​អាជ្ញាធរ​មូលដ្ឋាន​ជួយ​ដោះស្រាយ​ជាមួយ​លោក ព្រាប សុវត្ថិ មាន​៤ចំណុច គឺឈប់ឲ្យលោក ព្រាប សុវត្ថិ​ ធ្វើ​របង​បំ ពាន​លើផ្លូវ​សាធារណៈ, ឈប់ធ្វើ​រោង​ឈើ​បិទ​ផ្លូវ, ឈប់ចត​រថយន្តបិទ​ផ្លូវ ​គ្មាន​សណ្ដាប់ធ្នាប់ និង​ឈប់រោទ៍​សំឡេង​រថយន្ត​លាន់​ខ្លាំង​ ដេក​ពួន​មិនបាន។ ប៉ុន្តែរាល់បញ្ហាទាំងអស់នោះ ត្រូវបានសម្របសម្រួលដោះស្រាយគ្នា បញ្ចប់រួចរាល់ហើយ ដោយលោកយល់ព្រមអនុវត្តន៍ ៣ចំណុច​ ដើម្បីបញ្ចប់បញ្ហាទាំងអស់នេះ ជាមួយបងប្អូនប្រជាពលរដ្ឋ៕