Sprite-Sukolwat Phuangsombat ត្រូវបានមហាជននៅក្នុងប្រទេសថៃ និងនៅលើពិភពលោកទទួលស្គាល់ថា គឺជាតារាចម្រៀងរ៉េបដ៏ល្បីវ័យក្មេងមួយរូបដែលកំពុងតែទទួលបាននូវការគាំទ្រជាច្រើនពីសំណាក់យុវវ័យនាពេលបច្ចុប្បន្ន ថ្មីនេះ កាលពីប៉ុន្មានខែមុន តារាចម្រៀងរូបនេះ ក៏បានធ្វើការចេញបទរួមគ្នាជាមួយនឹងតារាចម្រៀងរ៉េប វណ្ណដា ផងដែរ ដែលមានចំណងជើងថា Run The Town ដែលបទចម្រៀងមួយនោះទទួលបានការគាំទ្រភ្លូកទីភ្លូកដី ។ 

Sprite តារាចម្រៀងរ៉េបវ័យក្មេងរូបនេះ ពីមុនត្រូវបានគេស្គាល់ថាជាកុមារម្នាក់ដែលមកពីទីក្រុងChachoengsao ដែលពេលនេះរូបគេត្រឹមតែជាក្មេងម្នាក់ដែលធ្វើការលក់ពោតនៅប្រាសាទតែប៉ុណ្ណោះ ។ ក្រោយពីចូលរួមប្រកួតនៅក្នុងកម្មវិធី Super 100របស់ប្រទេសថៃ ដោយនៅក្នុងនោះរូបគេបញ្ចេញនូវទេពកោសល្យនៃការច្រៀងរ៉េបដ៏អស្ចារ្យ ដែលប្រែក្លាយជីវិតពីក្មេងលក់ពោត ទៅជាសិល្បករវ័យក្មេងដ៏ចំណាន កំពុងតែមានឈ្មោះបោះសម្លេងយ៉ាងខ្លាំងនៅឆាកអន្ដរជាតិ និងមានឈ្មោះលើ Billboard Global ។ 

កាលពីពេលថ្មីៗនេះ តារាចម្រៀងរ៉េបវ័យក្មេងរូបនេះ ដែលមានអាយុត្រឹមតែ ១៦ ឆ្នាំបានធ្វើការបញ្ចេញនូវរូបថតជាច្រើនសន្លឹកនៅលើបណ្ដាញសង្គមអ៊ីនស្ដាក្រាមរបស់ខ្លួន ដោយបានធ្វើការបង្ហាញនូវផ្ទះវីឡាថ្មីស្រឡាងមួយខ្នង  ដោយនៅក្នុងនោះ Sprite បានធ្វើការសរសេររៀបរាប់ថា "នេះ​ជា​អនុស្សាវរីយ៍​ដ៏ល្អបំផុតនៅក្នុងជីវិតរបស់ខ្ញុំ នៅក្នុងការដែលទិញផ្ទះដោយខ្លួនឯងនៅអាយុ ១៦ "។

ខណៈពេលដែលមានមនុស្សជាច្រើននៅក្នុងឧស្សាហកម្មកម្សាន្ត និងអ្នកគាំទ្ររបស់ Sprite ដូចគ្នា បាននាំគ្នាចូលទៅ Like និង Comment ដើម្បីបង្ហាញពីការអបអរសាទរ និងកោតសរសើរចំពោះការខិតខំរបស់គេជាខ្លាំង ម្ដាយឪពុកពិតជាមានមោទនភាពខ្លាំងណាស់ចំពោះកូន ប្រុសមួយនេះ ។

សូមទស្សនាវីដេអូខាងក្រោម៖

ប្រភព៖ Sanook

សម្រួលដោយ៖ Qi an