រឿងពិត! សតិអារម្មណ៍ក្មេងៗនៅពេលជួបក្រុមជួយសង្គ្រោះ និង សំណួរកំសត់ៗធ្វើឱ្យគេស្រក់ទឹកភ្នែកដោយមិនដឹងខ្លួន…(មានវីដេអូ)

ថៃ៖ នេះគឺជាវីដេអូដំបូងបង្អស់ដែលក្រុមអ្នកជួយសង្គ្រោះជនជាតិអង់គ្លេសបានទៅជួបក្មេងៗទាំង ១២ និង គ្រូបង្វឹក ដែលទីតាំងរកឃើញគឺនៅឆ្ងាយពីទីទួល «ផាតតៈយ៉ាប៊ីត» ប្រហែល ៤០០ ម៉ែត្រ ដែលទីតាំងនោះឈ្មោះថា «នើននុមសាវ» ក្នុងវេលាម៉ោង ៩ យប់ និង ៣៨ នាទី កាលពីថ្ងៃច័ន្ទ ទី២ ខែកក្កដា ឆ្នាំ ២០១៨ ក្រោយពីជាប់ក្នុងល្អាងភ្នំយ៉ាងយូរអស់រយៈពេលជាង ១០ថ្ងៃ ។

គ្រាន់តែឃើញអ្នកជ្រមុជទឹកជនជាតិអង់គ្លេសទាំងពីរមកជួយសង្គ្រោះ ក្មេងៗបានប្រញាប់ស្រែក អរគុណ អរគុណ ដោយក្តីរំភើបយ៉ាងខ្លាំង ហើយក៏សួរបញ្ជាក់ផងដែរថា តើពេលណាអាចចេញទៅក្រៅ? ជនជាតិអង់គ្លេសទាំងពីរបានឆ្លើយតប នៅមិនទាន់អាចចេញបាន ព្រោះមានតែពួកគាត់ពីរនាក់ ហើយការដែលមកដល់ទីនេះ គឺធ្វើដំណើរដោយការជ្រមុជទឹកយ៉ាងយូរ ។

ដោយសារក្នុងល្អាងភ្នំមានតែសភាពងងឹត ដូចនេះក្មេងៗបានសួរថាថ្ងៃនេះជាថ្ងៃអ្វី ហើយក្រុមអ្នកជួយសង្គ្រោះក៏បញ្ជាក់ ជាថ្ងៃច័ន្ទ ឆ្លងចូលសប្តាហ៍ថ្មី ដែលអ្នកទាំងអស់គ្នាបានជាប់នៅទីនេះអស់ជាង ១០ ថ្ងៃមកហើយ តែពួកអ្នកគឺពិតជារឹងមាំ ។

ពេលដែលអ្នកជ្រមុជទឹករៀបនឹងចាកចេញ ក្មេងៗប៉ុន្មានអ្នកបានប្រញាប់ស្រែកថា ខ្ញុំឃ្លាន ខ្ញុំឃ្លាន បានឮដូចនេះ អ្នកជ្រមុជទឹកបានឆ្លើយតបវិញដែរថា ពួកយើងដឹងថា អ្នកទាំងអស់គ្នាពិតជាឃ្លាន តែសុំរងចាំសិន ពួកយើងត្រូវត្រឡប់ទៅវិញដើម្បីនាំទាំងអាហារ និង ក្រុមគ្រូពេទ្យមកជួប ហើយក៏ទុកពិលមួយចំនួនសម្រាប់ឱ្យក្មេងៗប្រើប្រាស់ផងដែរ ។

ពិតមែនតែជាប់ល្អាងភ្នំជាង ១០ ថ្ងៃ តែស្មារតី និង សុខភាពរបស់ក្មេងៗគឺមើលទៅពិតជារឹងមាំ ។ ទោះពេលនេះរកឃើញក្មេងៗពិតមែន តែក្រុមអ្នកជួយសង្គ្រោះនៅមិនទាន់អាចយកក្មេងៗចេញមកក្រៅល្អាងភ្នំមកជួបសាច់ញាតិជនរងគ្រោះនោះទេ ៕ សូមទស្សនាវិដេអូខាងក្រោម៖