រថយន្តដឹកតន្ត្រីភ្លេង បានដាច់កង់មុខក្រឡាប់ចូលប្រឡាយផ្ងាជើងទាំងកណ្ដាលថ្ងៃត្រង់
- 1554

ភ្នំពេញ៖ រថយន្តដឹកសម្ភារៈភ្លេងមួយគ្រឿង បានបើកបរសុខៗស្រាប់តែដាច់កាឡេកង់មុខ បណ្ដាលឲ្យរេចង្កូតធ្លាក់ផ្លូវចូលប្រឡាយក្រឡាប់ផ្ងាជើងឡើងលើ សំណាងល្អមិនបង្ករឲ្យមនុស្សរងរបួស។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីរវេលាម៉ោង១២និង០០នាទីថ្ងៃត្រង់ ថ្ងៃទី២ ខែសីហា ឆ្នាំ២០១៨ នៅបណ្ដោយផ្លូវជាតិលេខ២០ A ឋិតនៅក្នុងភូមិប្រធាត្រ សង្កាត់រលួស ខណ្ឌដង្កោ រាជធានីភ្នំពេញ។
អ្នកបើករថយន្ដរងគ្រោះខាងលើមានឈ្មោះ ចាន់ វិរៈ ភេទប្រុស អាយុ២៨ឆ្នាំ ស្នាក់នៅភូមិបឹងច្រាំ ឃុំព្រះនិពាន ស្រុលគងពិសី ខេត្តកំពងលស្ពឺ ។
បើតាមសម្តីអ្នកបើករថយន្តបានឲ្យដឹងថា មុនពេលកើតហេតុ រូបគាត់បានបើករថយន្ដដឹកសម្ភារៈភ្លេង ដើម្បីទៅលេងនៅស្រុកស្អាង តែពេលមកដល់ចំណុចកើតហេតុស្រាប់តែរថយន្ដដាច់កាឡេកង់ខាងមុខផ្នែកខាងស្ដាំធ្វើឲ្យរថយន្ដរេចង្កូតធ្លាក់ផ្លូវក្រឡាប់ផ្ងារជើងតែម្ដង តែមិនបណ្ដាលឲ្យរូបគាត់និងអ្នករួមដំណើរពីរនាក់ទៀតរងរបួសនោះទេ។
ក្រោយពីកើតហេតុ កម្លាំងសមត្ថកិច្ចមូលដ្ឋានបានចុះទៅដល់កន្លែងកើតហេតុ តែដោយឃើញរថយន្តខាងលើមិនប៉ះពាល់ដល់អ្នកដទៃ និងខូចខាតសម្បត្តិសាធារណៈ ទើបសមត្ថកិច្ចឲ្យម្ចាស់រថយន្ដហៅរថយន្ដស្ទួចមកស្ទួចយកទៅជួសជុលដោយខ្លួនឯង៕
ដោយៈ ភារ៉ា