លទ្ធផលលឿនពេក! បើករថយន្តលឿនពេក វ៉ាក់អើជាមួយរថយន្តផ្សែង ក៏ទាញចង្កូតក្រឡាប់ផ្ងារជើងខ្លួនឯង សំណាងគ្មានអ្នករបួស
- 1637

ភ្នំពេញ៖ រថយន្ដដឹកអេតចាយមួយគ្រឿង បានធ្វើដំណើរក្នុងល្បឿនលឿន មិនប្រយ័ត្ននៅផ្លូវបែកជាបួន ហើយគេចពីរថយន្ដផ្សែងកំពុងឆ្លងផ្លូវ ក៏បួងរេចង្កូតក្រឡាប់ផ្ងារជើងម្ខាង ចាក់សំភារៈអេតចាយពេញផ្លូវ សំណាងល្អគ្មានអ្នកណាម្នាក់រងរបួស ។

ហេតុការណ៍នេះកើតឡើងកាលពីវេលាម៉ោង១២ថ្ងៃត្រង់ ថ្ងៃទី១០ ខែសីហា ឆ្នាំ២០១៨ នៅចំណុចផ្លូវ៦០ ម៉ែត្រ ភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គេបានឃើញរថយន្ដដឹកអេតចាយមួយគ្រឿងបើកក្នុងល្បឿនលឿនពីទិសដៅកើតទៅលិច តាមបណ្ដោយផ្លូវ៥០ម៉ែត ស្រាប់តែមកដល់កន្លែងកើតហេតុដែលផ្លូវបែកជាបួន ក៏មានរថយន្ដមួយគ្រឿងមិនចាំម៉ាកបើកឆ្លងផ្លូវ ធ្វើឲ្យតៃកុងរថយន្ដខាងលើ បួងចង្កូតគេចខ្លាំងពេក បណ្ដាលឲ្យរថយន្តក្រឡាប់ផ្ងារជើងម្ខាងចាក់អេតចាយរាយពេញផ្លូវ តែសំណាងល្អមិនបង្ករឲ្យមនុស្សណាម្នាក់រងរបួសម្នាក់ឡើយ ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់កន្លែងកើតហើយបានរាយការណ៍ទៅជំនាញចរាចរណ៍ ប៉ុន្ដែករណីនេះមិនបានធ្វើឲ្យប៉ះពាល់សម្បត្ដិរដ្ឋ និងសម្បត្ដិសាធារណៈ ទើបសមត្ថកិច្ចឲ្យតំណាងរថយន្ដស្ទូចរថយន្ដទៅជួលជុលដោយខ្លួនឯង ដើម្បីបញ្ចប់រឿងនៅកន្លែងកើតហេតុតែម្ដង ៕
ដោយៈ ភារ៉ា