ភ្នំពេញ ៖ ស្ត្រីម្នាក់ប្រើល្បិចបន្លំយកខ្សែក កាឡៃដូរយកខ្សែកមាស ពិតបានមួយដំឡឹង នៅផ្ទះ លេខ៤៤ (ផ្សារច្បារអំពៅ) ហើយគេចខ្លួនបាន២ថ្ងៃ លុះមកផ្សារច្បារអំពៅម្តងទៀត ក៏ត្រូវសមត្ថកិច្ចចាប់ជាប់។ ដែលហេតុការណ៍នេះបានកើតឡើង នៅចំណុចភូមិកណ្តាល សង្កាត់ច្បារអំពៅ២ ខណ្ឌច្បារអំពៅ កាលពីថ្ងៃទី២២ ខែតុលា ឆ្នាំ២០១៨។
ជនសង្ស័យឈ្មោះ ម៉ាន ម៉ានរីយ៉ាន ភេទ ស្រី អាយុ៣៨ឆ្នាំ ជនជាតិខ្មែរឥស្លាម មុខរបរ មិនពិតប្រាកដ ស្នាក់នៅផ្ទះលេខ២៦A ផ្លូវ ជាតិលេខ៥សង្កាត់ព្រែកព្នៅ ខណ្ឌព្រែកព្នៅ ។ ជនរងគ្រោះឈ្មោះឡុង នីឡេង ភេទ ស្រី អាយុ៣១ឆ្នាំ ជនជាតិខ្មែរ មុខរបរ លក់គ្រឿងអលង្ការ ស្នាក់នៅផ្ទះកើតហេតុ។
សមត្ថកិច្ចបានឲ្យដឹង កាលពីថ្ងៃទី២០ ខែតុលា ជនសង្ស័យបានដើរមកទិញគ្រឿងអលង្ការ ដោយពេលនោះជនរងគ្រោះ និងប្តីកំពុងតែលក់ ។ ភ្លាមនោះ ជនសង្ស័យបានសុំមើលខ្សែកមាស ម៉ូតច្រវ៉ាក់ឆាប១ខ្សែ ទម្ងន់ ១ដំឡឹងមកមើល រួមក៏ពាក់នឹងក ក្នុងពេលនោះ ជនរងគ្រោះភ្លេចខ្លួន ជនសង្ស័យក៏បានដោះខ្សែក កាឡៃដែលខ្លួនបានពាក់ជាប់នឹងកនោះ មកវិញ ហើយបានប្រាប់អ្នកលក់ថា ឲ្យទុកវិញទៅ ហើយអ្នកលក់បានប្រាប់ថា ចឹងមើលខ្សែកផ្សេងទៅ ជនរងគ្រោះក៏បានយកមកឲ្យមើល ខណៈពេលអោនយកខ្សែកនោះ ជនសង្ស័យក៏ដើរចេញមកក្រៅបាត់តែម្តង។ បន្ទាប់ពីលួចបានហើយ ជនសង្ស័យក៏បានយកខ្សែកទៅលក់ ឲ្យគេនៅម្តុំផ្សារទួលសង្កែ បានលុយ ១៤៣០ដុល្លារ យកលុយទៅសងគេអស់។
លុះដល់ថ្ងៃទី២២ខែតុលាវេលា ម៉ោង១៤ និង០០នាទី ជនសង្ស័យដើរចូលក្នុងផ្សារច្បារអំពៅដើម្បីរកបន្លំលួចគ្រឿងអលង្ការគេទៀត ក៏ត្រូវបានសមត្ថកិច្ចឃាត់ខ្លួន និងដកហូតវត្ថុតាងរួមមាន ៖ ខ្សែកកាឡៃ ១៧ខ្សែ, ខ្សែដៃកាឡែ ១ខ្សែ, ចិញ្ជៀនកាឡៃ៨វង់, ក្រវិលកាឡៃមានដាំត្បូងពណ៌ស ២គូ, បណ្តោងខ្សែកកាឡៃមានដាំត្បូងពណ៌ស១, ទូរសព្ទដៃ២គ្រឿង (ម៉ាក iPhone៦ ពណ៌ទឹកមាស, ម៉ាក iPhone៥ ពណ៌ផ្កាឈូក), លុយដុល្លារ ២ដុល្លារ, លុយខ្មែរ៦០០០រៀល, កាបូបក្រវ៉ាត់ចង្កេះពណ៌ខ្មៅ ១ និងថង់ប្លាស្ទិចពណ៌ខ្មៅ១ បញ្ជូនមកអធិការដ្ឋាន នគរបាលខណ្ឌច្បារអំពៅ ចាត់ការតាមច្បាប់៕
ដោយ៖ ភត្រ្តា
