នេះ មានរឿង​រ៉ាវ​ដ៏​ហួសចិត្ត​មួយ​ កើត​ឡើងលើ​ស្ត្រី​ថៃ​ម្នាក់ គឺ​នាង​បាន​ក​ម្ម៉​ង់​ទិញ​កាបូប​ម៉ាក​ល្បី​តាម Online ក្នុង​ថត​ម្លៃ​ជាង ១​ពាន់​ដុល្លារ ប៉ុន្តែ​បែរ​ជា​បាន​ដប​ទឹក ២​ដប​មកវិញ ខណៈដែល​លុយ​ទាំងអស់ ត្រូវបាន​ផ្ញើឱ្យ​អ្នកលក់​រួចរាល់​អស់​ទៅហើយ ។​ស្ត្រី​រងគ្រោះ​មានឈ្មោះ Panhathai Lertsin-udom បានឱ្យដឹងថា នាង​បាន​ក​ម្ម៉​ង់​ទិញ​កាបូប​ម៉ាក Celine កាលពី​ថ្ងៃ​អង្គារ៍សប្ដាហ៍​មុន បន្ទាប់ពី​ទំព័រ Instagram មួយ​មាន​ឈ្មោះថា brandnameby_Oa បង្ហោះ​លក់ ដោយ​អ្នកលក់​ឈ្មោះ B.PROMOTE ។ កាបូប​នេះ​បាន​ដាក់លក់​ក្នុងតម្លៃ ១១០០​ដុល្លារ ហើយក៏​បាន​ផ្ញើ​ចូលទៅ​គណនី​ធនាគា​ដែល​លក់​ឈ្មោះ B.PROMOTE ផ្ញើ​មកឱ្យ ។

​បន្ទាប់ពី​បាន​ផ្ញើ​លុយ​ឱ្យ​គ្រប់​ចំនួន​ហើយ​នោះ ទំនិញ​ក៏បាន​មកដល់​តាមរយៈ​ក្រុមហ៊ុន​ដឹកជញ្ជូន Kerry Express Thailand ហើយ​អ្វីដែល​ធ្វើឱ្យ​ហួសចិត្ត​ស្ទើរតែ​គ្មាន​ពាក្យ​និយាយ​នោះ គឺ​ទំនិញ​នោះ​មិនមែនជា​កាបូប​ឡើយ គឺជា​ដប​ទឹក រូប Kung Fu Panda ចំនួន ២ ទៅវិញ ហើយ​ពេលនោះ គណនី Line របស់ B.PROMOTE ត្រូវបាន​បិទ ដែល​ធ្វើឱ្យ​ស្ត្រី​រងគ្រោះ​ពុំ​អាច​ទំនាក់ទំនង​ទៅវិញ​បាន ។

​ក្រោយមក​ស្ត្រី​រងគ្រោះ ក៏បាន​ដាក់ពាក្យ​ប្ដឹង ដោយ​ប្រមូល​ឯកសារ​ទំនាក់ទំនង​តាម​ឆាត​ជាមួយ​អ្នកលក់ Online ខាងលើនេះ ដើម្បី​បង្ហាញ​ដល់​ប៉ូលិស ។ យ៉ាងណាមិញ កាសែត​ថៃ បាងកកប៉ុស្ដិ៍ បាន​ទាក់ទង​ជាមួយ​ទំព័រ អ៊ីនស្ដ្រាក្រាម ឈ្មោះ brandnameby_Oa ខាងលើ ដែល​គេ​ប្រើ​ដើម្បី​បង្ហោះ​លក់​ផលិតផល​ប្រណីត​មួយ​ទឹកៗ ហើយ​ដឹងថា ទំព័រ​នេះ គឺ​គ្រាន់តែ​ជា​ទំព័រ​រកស៊ី​ជួល​បង្ហោះ​ផ្សាយ​លក់ទំនិញ​តែប៉ុណ្ណោះ ៕

ប្រភពៈ kamsantoday