ពពួកសាច់ជ្រូកប្តូរពណ៌ទៅជាក្រម៉ៅ ធុំក្លិនអាសោធ…ប៉ុន្តែនៅពេលត្រូវបានជ្រលក់ក្នុងសារធាតុគីមី វាប្រែក្លាយទៅជាក្រហមច្រាលដូចទើបព្រលះនៅលានសត្វឃាត ។ នេះជាវិធីដែលបន្លំភ្នែក អ្នកទិញបានយ៉ាងងាយ ។
ថ្វីត្បិតអតិថិជនជាច្រើនបានដឹងឮព័ត៌មាននេះ តែមានមនុស្សប៉ុន្មាននាក់ ដែលដឹងថាជាសាច់ជ្រូក “ល្អ” និង “កខ្វក់” នោះ ពេលខ្លះទាល់តែបរិភោគទើបភ្ញក់ខ្លួនព្រើត “ចោលស្តាយ ហូបទៅប៉ះពាល់សុខភាព” ។ អ្នកលក់ដែលបានបោះចោលរបរនេះប្រាប់ថា បើប្រទះឃើញសាច់មានសញ្ញាខាងក្រោម “កុំទិញឲ្យសោះ” ។
១.យកដៃចាប់សាច់ បើឃើញវាស្អិតៗជាប់ដៃគឺកុំទិញ
មូលហេតុគឺ ៖ សាច់ជ្រូកដែលគុណភាពប្រែប្រួល (ខូច) វាកកើតនូវពពួកមេរោគយ៉ាងច្រើន ។ សារធាតុបំប្លែងរបស់ពួកវាធ្វើឲ្យផ្នែកខាងក្រៅនៃសាច់ជាប់ស្អិតៗ ។ សាច់ល្អគឺវាស្ងួត សំឡឹងមើលផ្នែកខ្លាញ់វាហាក់សើមៗ តែពុំស្អិតជាប់ដៃទេ ។
២.សាច់ជ្រូកដែលមានកម្រាស់ខ្លាញ់ក្រោម ១ សង់ទីម៉ែត្រ
ស្រទាប់ខ្លាញ់នៅនឹងសាច់ស្តើងឬក្រាស់ទាក់ទងដល់ពូជជ្រូក ។ ជាធម្មតាពូជជ្រូកទូទៅមានស្រទាប់ខ្លាញ់ក្រាស់គួរសម មានតែពូជជ្រូកអង្ករទេ ដែលមានខ្លាញ់ស្តើង ។ ពិសេសសាច់ជ្រូកដែលប្រើអ័រម៉ូនបង្កើនទម្ងន់ខ្លាំង នោះសាច់របស់វាចាប់ភ្នែកណាស់ តែស្រទាប់ខ្លាញ់របស់វាមិនដល់១សង់ទីម៉ែត្រទេ ។ តំណភ្ជាប់រវាងសាច់ និងស្បែកវាមិនស្អិតជាប់ស្វិតទេ ពេលហាន់វានោះស្រទាប់នេះងាយរលេះចេញពីគ្នា ។
៣.ផ្ទៃលើនៃសាច់មិនរលើបរលោងទេ ៖
មានតែសាច់ជ្រូកល្អទេ ដែលសាច់ ស្បែក របស់វារលើបរលោង មានពណ៌ក្រហម (មិនមែនក្រហមក្រម៉ៅទេ) ។ សាច់ខូចគុណភាព មានពណ៌ក្រម៉ៅ ហើយបើសាច់ជ្រូកមានជំងឺវិញ វាមានពណ៌ស្ទើរខ្មៅស្រអាប់ ។ ពេលហាន់វានោះនឹងឃើញមានស្នាមក្រហមឆ្នូតៗ ហើយបើជ្រូកបាវិញនោះ ពិតជាមានក្លិនពិបាកទ្រាំ ស្បែកវាក្រាស់ ហើយជាផ្នត់ៗ ។ សាច់ជ្រូកល្អវារលើបរលោង តែស្ងួតពណ៌មិនក្រម៉ៅ។
៤.សាច់មិនល្អគឺមានសភាពរឹងក្រញ៉ង់
សាច់ជ្រូកល្អវាមានសភាពរស់ដោយគ្រាន់តែយកចង្អុលដៃទៅចុចវានឹងស្រុត ហើពេលដកដៃវានឹងវិលមកសភាពដើមវិញ ។
ចំណែកសាច់ជ្រូកកខ្វក់នោះផ្នែកប្រូតេអ៊ីន នោះខ្លាញ់របស់វាធ្វើការបំប្លែង ធ្វើឲ្យលែងមានសភាពផ្សាភ្ជាប់គ្នាល្អ ក្លាយទៅជារឹងក្រញ៉ង់ (មិនមានសភាពរស់រវើក) ។ ជ្រូកដែលគេបាញ់បញ្ចូលទឹកក៏មានសភាពដូចជ្រូកកខ្វក់ ឬជ្រូកគីមីដែរ ។ សាច់ជ្រូកល្អមានសភាពទន់យឺត រស់រវើកតែម្ដង។
៥.សាច់ជ្រូកដែលមានចំណុចគ្រើមៗប៉ុនគ្រាប់អង្ករ ៖
ពេលឃើញសាច់កំភួន សាច់ស្មា សាច់ច្រឡក ។ល។ ដែលមានចំណុចគ្រើមៗប៉ុនគ្រាប់អង្ករលេចឡើង ត្រូវពិនិត្យឲ្យម៉ត់ចត់ ។ វាអាចជាជង្រុកនៃពពួកព្រូន តេនញ៉ា ។ ពេលហាន់វាអ្នកអាចប្រទះឃើញវាជ្រុះធ្លាក់ជាកង់ៗ ដាច់ខាតមិនត្រូវបរិភោគ ព្រោះវាអាចចម្លងរោគធ្ងន់ធ្ងរដល់អ្នកបាន ។
៦.ជញ្ជ្រាំងមានកន្តួលក្រហមៗ ៖
ដើម្បីឲ្យប្រាកដ អ្នកយកក្រចកដៃដករោមជាប់ស្បែកវា ២-៣សរសៃ ហើយពិនិត្យមើល បើឃើញគល់រោមនោះមានពណ៌ក្រហមៗគឺជាជ្រូកគីមីខូចគុណភាពហើយ ព្រោះសាច់ជ្រូកល្អពេលអ្នកដកជញ្ជ្រាំងរោមវាគឺវានៅសដដែល ៕
.jpg?1634184315)
.jpg?1630406232)
.jpg?1627311031)
.jpg?1623499049)
