ប្រិយមិត្តជាច្រើនបានជ្រាបហើយថា តារាចម្រៀងពូកែរ៉េប ជី ដេវីត និង​កញ្ញា ទេព បូព្រឹក្ស កាន់តែមានភាពផ្អែមល្ហែមឡើងៗ ដោយអ្នកទាំងពីរបានទាក់ទងគ្នាអស់រយៈពេល ៤ឆ្នាំហើយ ក្នុងពេលនេះ ពួកគេទាំងពីរនាក់ កាន់តែមានជីវីតហ៊ឺហារ ឡូយឆាយ មាន លុយទិញគ្រឿងពេជ្រដូរគ្រប់ម៉ូត ព្រមទាំងប្រើប្រាស់សម្ភារៈម៉ាកល្បីៗទៀតផង ក្រោយជោគជ័យលើវិថីសិល្បៈ និងជំនួញ។ មិនតែប៉ុណ្ណោះ កាលពីពេលថ្មីៗនេះ លោកបានទិញឡានស៊េរីទំនើបម៉ាក Rolls Royce ជូនដល់គូស្នេហ៍ ទុកជាកាដូថ្ងៃ Anniversary បន្ទាប់ពីទាក់ទងគ្នាបាន០៤ឆ្នាំមកនេះ។

យ៉ាងណាមិញ គេសង្កេតឃើញថា តារាចម្រៀងពូកែរ៉េប ជី ដេវីត របើកបង្ហាញការ Live តារារូបនេះកំពុងតែរៀបចំបួសធ្វើជាព្រះសង្ឃ ដែលគេហៅថា បំបួសនាគ​មាន​ន័យថា ជាការ​បំបួស​កុល​បុត្រ​មិន​ថា ក្មេង ឬ​ចាស់​ឡើយ ឱ្យ​តែ​​បុគ្គ​ល​នោះ​មាន​សទ្ធា​​ចង់​ក្លាយ​ជា​ព្រះសង្ឃ ។ ចំពោះ​ការ​បួស​ប្រសិន​បើ​បុគ្គល​នោះ​ចង់​បួស​ត្រឹម​តែ​ជា​​សាមណេរ គឺ​មិន​ប្រកាន់​អាយុ​ឡើយ តែ​បើ​ចង់​បួស​ជាភិក្ខុ​​ទាល់​តែ​​មាន​អាយុ​២០​ឆ្នាំ​ពេញឡើង​ទៅ​ទើប​អាចបួសបាន ។ ឯបុគ្គល​ដែល​គេ​ហៅថា នាគ គឺជា​អ្នក​ដែល​ត្រូវ​បួស ស្ថិត​ក្នុង​ពេល​​​រៀប​ចំពិធី​បំបួស​នោះ​ឯង លុះពេល​បំបួស​រួច​រាល់​បុគ្គល​នោះ​នឹង​ក្លាយ​ជា​ព្រះ​សង្ឃ​​​លែង​​ជា​​នាគ​ទៀត​ហើយ ។

ក្នុងនោះដែរ កញ្ញា ទេព បូព្រឹក្ស ក៏បានបង្ហោះសារថា “សូមបងប្អូនទូទាំងប្រទេសអនុមោទនានូវកុសលផលបុណ្យផងចុះជួបតែសេចក្តីសុខ ចំរើន ជៀសផុតពីជំងឺទាំងឡាយ សូមឲ្យមារ បវាសជៀសឲ្យឆ្ងាយ សត្រូវទាំងឡាយសូមឲ្យក្លាយជាមិត្ត ប្រថ្នាអ្វីបានសំរេចដូចបំណង សេចក្តីល្អនឹងនាំឲ្យយើងជួបតែភាពជោគជ័យ”៕