ភ្នំពេញ៖ លោកស្រី ទ្រី ដាណា ដែលជាម្ចាស់ហាងពេជ្រ និងជាម្ចាស់ក្រុមហ៊ុនគ្រឿងសំអាង ដ៏ធំមួយនៅក្នុងព្រះរាជាណាចក្រកម្ពុជា ដែលមានឈ្មោះថា NNP ដោយទទួលបានការគាំទ្រយ៉ាងពេញទំហឹងពីសំណាក់មហាជន ។ បច្ចុប្បន្ន គ្រឿងសំអាងរបស់លោកស្រី ទ្រី ដាណា កំពុងតែធ្វើឲ្យអ្នកប្រើប្រាស់ឈ្លក់វង្វេង និងជាប់ចិត្តយ៉ាងខ្លាំង។ ជាក់ស្តែង ក្រៅពីជាម្ចាស់គ្រឿងសម្អាងដ៏ល្បីឈ្មោះហើយនោះ លោកស្រី ទ្រី ដាណា ក៏ជាបុគ្គលម្នាក់ ដែលមានឈ្មោះល្បី រឿងសប្បុរសធម៏ផងដែរ។
យ៉ាងណាមិញ លោកស្រី ទ្រី ដាណា បានបង្ហោះសារយ៉ាងវែងអន្លាយលើបណ្តាញសង្គមហ្វេសប៊ុកផ្ទាល់របស់លោកស្រី ទាំងអារម្មណ៍ក្តុកក្តួល ពេលបានឃើញទឹកភ្នែករបស់ក្មួយស្រីថា "មិនយំទេ គ្រាន់តែស្រក់ទឹកភ្នែក ខ្ញុំមើលវីដេអូនេះ ឡើងវិញពេលណាក៏មានអារម្មណ៍ថាចង់ហូរទឹកភ្នែកតាម ស្រណោះជីវិតខ្លួនឯងកាលពីក្មេងណាស់។ មិនខុសគាត់ប៉ុន្មានទេ ពេលនេះ គាត់អាយុ ៨ឆ្នាំ រៀនថ្នាក់ទី២ បើគិតជីវិតខ្ញុំកាល ៨ឆ្នាំដូចគ្នា ឪពុកម្ដាយ កំពុងរាវលៀស លក់លៀស លក់ត្រី លក់សព្វមុខ។
លោកស្រី បានបន្តថា ខ្ញុំអាណិតពួកគាត់ណាស់ គិតថាថ្ងៃណាមួយ ឈប់ឱ្យគាត់ហត់ទៀតហើយ ខ្ញុំនឹងខំប្រឹង ពេលខ្លះខ្ញុំលួចស្រក់ទឹកភ្នែក លួចអាណិតគាត់ ទោះបីនៅក្មេងក៏ដោយ ក៏ដឹងថាឪពុកម្ដាយ គាត់ហត់យ៉ាងណា។
លោកស្រី បានបន្ថែមទៀតថា កាលមិនទាន់ដឹងក្ដី ខ្ញុំខ្មាសគេ ខ្ញុំគេចមិត្តភក្តិ ទៅសាលាដូចគ្នា ពុកម៉ែគេធ្វើការ ជូនទៅរៀន ខ្ញុំមិនឱ្យពួកគាត់ជូនទៅទេ ខ្លាចគេឃើញខ្មាសគេ មានឪពុកម្ដាយលក់ត្រី លក់លៀស។ តែពេលដឹងក្ដី ខ្ញុំស្ដាយណាស់ ស្ដាយក្រោយគិតខុស ស្ដាយក្រោយ ព្រោះឪពុកម្ដាយប្រឹងដើម្បីខ្លួនដោយមិនខ្មាស ឯខ្លួនឯងយកលុយគាត់ទៅចាយ បែរជាខ្មាស។
ចាប់ពីពេលនោះ ខ្ញុំជួយលក់គាត់ ជួយការងារគាត់ ហើយក៏ខំប្រឹងរៀនផង គិតផង ថាធំទៅ អាចធ្វើអីបានប្រសើរជាងជីវិតរាល់ថ្ងៃនោះ។ ទៅសាលា ខ្ញុំរឹងមាំណាស់ ខ្ញុំចូលចិត្តធ្វើអីខុសពីគេ ចូលចិត្តធ្វើមេគេ ចូលចិត្តនាំមុខគេ។ ក្រោយមក ទើបខ្ញុំដឹងថា ជីវិតក្រោកពីការលំបាក វារឹងមាំប៉ុណ្ណា។
ខ្ញុំចាប់ផ្ដើមចេះការងារសព្វគ្រប់ ចេះពីរបៀបរកស៊ី ហើយក៏ចាប់ផ្ដើមតស៊ូងើបពីការលំបាកបន្តិចម្ដងៗ។ ជីវភាពក៏បានធូរបន្តិច ខ្ញុំគិតថានឹងធ្វើឱ្យឪពុកម្ដាយ រស់បានស្រួល ប៉ុន្តែមិនទាន់សម្រេចគោលដៅ លោកទាំង២ ក៏ទៅចោលអស់បន្តបន្ទាប់ត្រឹមពេលដ៏ខ្លី។ ចង់ប្រាប់អ្នកទាំង២ ថាកូនបានជោគជ័យហើយ អ្នកទាំង២ បានឃើញទេ? ហើយក៏ចង់សួរអ្នកទាំង២ដែរ ហេតុអីចម្លងកូនដល់ត្រើយហើយ ឱ្យកូនចាប់ផ្ដើមស្គាល់ជោគជ័យហើយ ក៏ទៅចោលកូនបាត់ ម៉េចមិនឱ្យកូនបានសងគុណអ្នកទាំង២សិន?
ទឹកភ្នែកស្រក់មិនមែនគ្មានបញ្ហាទេ ហើយទឹកភ្នែកដែលស្រក់ដោយស្ងប់ស្ងាត់បំផុត ក៏បង្កប់នូវការឈឺចាប់បំផុត កូននឹកអ្នកទាំង២ ណាស់ "។
មានវិដេអូ៖
