ភ្នំពេញ៖ កាលពីថ្ងៃទី១៥ ខែសីហា ឆ្នាំ២០២០នេះ លោកស្រី ទ្រី ដាណា អគ្គនាយិកាក្រុមហ៊ុន ដាណាទ្រី ខេមបូឌា ត្រេនដីង ខូអ៊ិលធីឌី និងលោក ហ៊ីង បញ្ញារិទ្ធ ដែលជាស្វាមី រួមទាំងតំណាងចែកចាយ ប្រេន NNP NUNA បានរៀបចំកម្មវិធីសច្ចាប្រណិធាន ដ៏ធំមួយ ក្នុងគោលបំណង ដើម្បីស្បថស្បែ បញ្ជាក់ពីភាពសច្ចៈ និងភាពស្មោះត្រង់ជូនតំណាងចែកចាយទូទាំង២៥ ខេត្ត-ក្រុង ។
ជាក់ស្តែងលោកស្រី ទ្រី ដាណា បានញ្ជាក់យ៉ាងច្បាស់លើបណ្តាញសង្គមរបស់លោកស្រីទៀតថា "ថ្ងៃនេះ នាងខ្ញុំ និងស្វាមីបានធ្វើសច្ចាប្រណិធាន ផឹកទឹកសម្បថ បញ្ជាក់ពីភាពស្មោះត្រង់ នៅមុខព្រះសង្ឃ បារមីគ្រប់ទិសទី និងគ្រប់ជាន់ថ្នាក់ នាងខ្ញុំមិនដែលបោកប្រាស់ មិនចេះសម្ដែង មុខមហាជន មិនកិបកេងតំណាង មិនដែលបង្រៀនពួកគាត់ ឱ្យប្រាសចាកពីភាពត្រឹមត្រូវឡើយ។
បើគ្រប់យ៉ាងដែលនាងខ្ញុំធ្វើ ជារឿងសម្ដែង បើនាងខ្ញុំបានកិបកេងតំណាង រកស៊ីមិនត្រឹមត្រូវ សុំឱ្យរលាយទ្រព្យទាំងអស់ដែលខ្ញុំរកបានទាំងលំបាក សុំឱ្យជីវិតខ្ញុំរលត់ភ្លាមៗ ជិះឡានក្រឡាប់ឡាន ធ្វើដំណើរជួបគ្រោះទាន់ហត់ វិនាសមរណា អន្តរាយភ្លាមៗ។ ខ្ញុំសូមធ្វើសម្បថចំពោះបារមី អារុក្ខអារក្ស លោកតាក្រហមក ព្រះអង្គចេកព្រះអង្គចម អ្នកតាឃ្លាំងមឿង អ្នកតាដំបងដែក អ្នកតាដំបងគ្រញូង លោកយាយទេព ព្រះអង្គវិហារ ព្រះអង្គវត្តគោកស្លែង។
នៅថ្ងៃនេះ ខ្ញុំសុំបន់ស្រន់ដល់ទេវតា បារមីគ្រប់ទិសទី មកជួយធ្វើជាអធិបតីសាក្សីចំពោះពិធីសម្បថនេះ ហើយថែរក្សាអ្នកតំណាងនៃប្រេនទាំង៣ NNP NUNA CTM ឱ្យរីកចម្រើនតកូនចៅ។ សូមអស់លោកអារុក្ខអារក្ស អ្នកតា និងបារមីដ៏ស័ក្តិសិទ្ធិទាំងអស់ ជួយដឹងលឺ បើមានអ្នកបំពាន យាយី បង្ខូចឈ្មោះរូបនាងខ្ញុំ និងអ្នកតំណាងចែកចាយ នៃក្រុមហ៊ុន ដាណា ទ្រី សូមឱ្យសាបដូចជាទឹកទន្លេ រីងហួតដូចជាវាលខ្សាច់ បរាជ័យគ្រប់ភារកិច្ច និងការរកស៊ី ទោះបីកំពុងរីកចម្រើនយ៉ាងណាក៏ដោយ ។
នាងខ្ញុំ ទ្រី ដាណា និយាយពិត ធ្វើពិត ធ្វើដោយភាពត្រឹមត្រូវ មិនបោកប្រាស់ មិនសម្ដែងឡើយ"៕
